Hyseni: Rritet buxheti për sektorin e bujqësisë dhe mbështetja e fermerëve në forma të ndryshme

Komuna e Gjilanit njofton se po vazhdon mbështetja për sektorin e bujqësisë dhe fermerët dhe se është rritur buxheti nga 390 mijë në 1.5 milionë euro.

Kryetari i Komunës së Gjilanit, Alban Hyseni, ka theksuar se drejtoria e Bujqësisë dhe Pylltarisë ka shënuar progres në rritjen e buxhetit e si rezultat ka rritur edhe mbështetjen në forma të ndryshme.

“Drejtoria e Bujqësisë dhe Pylltarisë, duke krahasuar periudhën e punës për vitet 2019-2021 dhe 2021-2024 ka shënuar progres në rritjen e buxhetit e si rezultat dhe rritjet e mbështetjes në forma të ndryshme, për fermerët e gjithashtu dhe rritjen e numrit të përfituesve. Nga viti 2021, ka pasur rritje të jashtëzakonshme të buxhetit të bujqësisë dhe vlera e këtij buxheti vetëm në vitin 2023 ka qenë mbi 1 milion euro”, tha Hyseni.

Kryetari, tregoi se janë 3140 përfitues të farës së grurit, derisa më të kaluarën ishin 2025 përfitues.

“Përfitues të farës së misrit janë 1811 persona, e më parë ishin 983. Rrugë fushore janë 24 km, derisa ishin 19 km. Mekanizëm bujqësor janë 122, ishin 70 përfitues. Me drunjtë dekorativ janë 1000 përfitues, e më parë ishin 870. Përfitues të fidanëve të arrës janë 49. Koshere të bletëve janë 55. Subvencionim me krerë gjedhe janë 156 dhe është bërë trajtimi i 916 qenve endacak”, ka theksuar Hyseni.

I pari i Komunës së Gjilanit, tregoi edhe për projektet e reja e që janë subvencionimi i qumështit, ku 23 përfituesë u mbështetën me 22,585.61 euro.

“Për herë të parë pas luftës Komuna e Gjilanit, respektivisht Drejtoria e Bujqësisë, ka subvencionuar me pagesë direkte prodhuesit e qumështit në komunën tonë, me vlerë 0.08 cent. Derisa tash do të jetë subvencioni nga 10 centë për litër”, tha Alban Hyseni.

Kryetari i komunës, theksoi se gjithashtu, Drejtoria e Bujqësisë, për herë të parë ka subvencionuar fermerët me panele solare të kapacitetit prej 3.6 Kë.

“Nga 2500 fermerë që kemi kanë përfituar 1500 kanë përfituar Brenda një viti. Më herët ishte subvencioni 1500 euro, ndërsa tash është 5000 mijë euro dhe i’u lejohet që të aplikojnë në disa projekte e jo vetëm në një”, tha kryetari Hyseni.

I pari i Gjilanit, tregoi se këto masa kanë rezultuar në përmirësimin e kushteve për fermerët, rritjen e prodhimit lokal dhe avancimin e praktikave të qëndrueshme në bujqësi, duke kontribuar në zhvillimin e qëndrueshëm. /Telegrafi/