Huawei: Askush nuk bën para nga Windows Phone

Prodhuesi kinez i telefonave të mençur – Huawei është vënë publikisht kundër platformës mobile të Microsoft, Windows Phone, duke pretenduar se nuk ka prodhues që ka arritur të fitojë para përmes adaptimit të këtij sistemi operativ mobil.

Më parë gjatë vitit, Huawei kishte plane për të nisur një model të telefonit të mençur që bazohej në dy sisteme të ndryshme operative, përkatësisht në Android dhe Windows Phone. Megjithatë, kompania kishte vendosur t’i braktis këto plane.

Edhe në atë kohë, shefi i marketingut në Huawei, Shao Yang pranoi se "krahasuar me Android, prioriteti ndaj Windows Phone është shumë më i ulët."

Tani, në një intervistë me The Seattle Times, një ekzekutiv tjetër i kompanisë deklaroi se deri më sot, askush nuk ka arritur të bëjë para nga Windows Phone. "Askush (asnjë prodhues) nuk bëri para në Windows Phone."

Microsoft ka ndërmarrë hapa për ta bërë Windows Phone më tërheqës ndaj prodhuesve të tjerë. Madje, kompania amerikane ka krijuar edhe partneritete të reja me prodhuesit kinezë të tillë si Lenovo dhe ZTE, por me sa duket, as kjo lëvizje nuk e ka ndihmuar kompaninë që të tjerët të deklarohen kaq kundër partneritetit me sistemin e saj operativ. (Telegrafi)