Hoxhaj: Ushtrinë e bëmë, tash ta anëtarësojmë në NATO

Ish-ministri i Jashtëm i Kosovës, Enver Hoxhaj, ka rikujtuar një moment të rëndësishëm në historinë e vendit, duke deklaruar se transformimi i Forcës së Sigurisë së Kosovës (FSK) në Ushtri të Kosovës është rezultat i angazhimeve të përbashkëta politike dhe diplomatike.

Në një postim në Facebook, Hoxhaj ka ndarë detaje nga verën e vitit 2018, kur gjatë Konferencës së Kartës së Adriatikut takoi Sekretarin amerikan të Mbrojtjes, James Mattis.

Ai ka theksuar se në atë takim ka argumentuar qartë se Kosova është e gatshme për ushtrinë e saj, një hap që, sipas tij, i dha shtysë Kuvendit të Kosovës për miratimin e Ligjit për transformimin e FSK-së në Ushtri të Kosovës.

“Ushtrinë e bëmë, tash duhet ta anëtarësojmë në NATO,” ka shkruar Hoxhaj, derisa ka shpërndarë pamje nga konferenca e Kartës së Adriatikut, duke paralajmëruar se prioriteti i qeverisë së ardhshme, e udhëhequr nga Partia Demokratike e Kosovës (PDK), do të jetë përpjekja për anëtarësimin e Ushtrisë së Kosovës në Aleancën e Atlantikut Verior.

Hoxhaj ka theksuar se ndërtimi i ushtrisë ishte një arritje strategjike për shtetin e Kosovës, por anëtarësimi në NATO do të përmbyllte vizionin e plotë të sigurisë dhe stabilitetit për vendin dhe rajonin. /Telegrafi/