Hoti: Ekzekutohen pagesat për 15 mijë të vetëpunësuar, nga java e ardhshme 12 milionë për bujqësinë

Rreth 15 mijë të vetëpunësuar kanë përfituar rreth 6.5 milionë euro ndihmë si pjesë e Pakos së rimëkëmbjes ekonomike.

Këtë lajm e ka dhënë kryeministri në detyrë Avdullah Hoti  në një konferencë bashkë me ministrat Hikmete Bajrami e Muharrem Nitaj.

“Përfitojnë rreth 15 mijë të vetëpunësuar në mbarë vendin nga rreth 21 mijë sa janë në total. Pjesa tjetër do të përfitojë sapo të qartësohen detajet rreth kompanive”.

Hoti thotë se nga java tjetër do të fillojë ekzekutimi i subvencioneve për bujqësi prej 12 milionë eurove.

“Gjithashtu kemi hapur thirrjen për të ndihmuar gratë në biznes me një shumë prej 1 milionë eurove”, tha ai, përcjell Telegrafi.

Kryeministri në detyrë ka thënë se janë duke u përgatitur edhe kriteret për të ndihmuar sektorin e gastronomisë.

“Vendimet e qeverisë me masat antiCOVID kanë prekur direkt sektorin e gastronomisë”.

Hoti thotë se është pozitiv fakti se trendi i të hyrave në janar të vitit 2020 është i njëjtë si në janarin e vitit të kaluar kur nuk ka pasur pandemi dhe mbyllje.

“Kjo tregon se pako e rimëkëmbjes ekonomike ka pasur efekt”.

I pari i qeverisë ka thënë se vaksinat që pritet të vijnë në Kosovë në pranverën e hershme do të sjellin normalitetin në vend./Telegrafi/