Kryetari i Aleancës për Ardhmërinë e Kosovës (AAK), Ramush Haradinaj, ka zhvilluar sot një takim në Ambasadën e Shteteve të Bashkuara të Amerikës në Prishtinë me zyrtarë të lartë të Departamentit Amerikan të Shtetit.
Gjatë vizitës, Haradinaj është pritur nga Brendan Hanrahan, zyrtar i lartë në Byronë për Çështjet Evropiane dhe Euroaziatike, dhe nga Mark Fleming, Zëvendës Ndihmës Sekretar i Shtetit në detyrë.
Në këtë takim, Haradinaj ka vënë në pah rëndësinë e thellimit të marrëdhënieve bilaterale ndërmjet Republikës së Kosovës dhe Shteteve të Bashkuara, me theks të veçantë në bashkëpunimin në fushën e sigurisë.
“Republika e Kosovës mbetet e përkushtuar për anëtarësimin e plotë në NATO, dhe mbështetja e SHBA-së është kyçe për këtë rrugë. Aleanca jonë me Amerikën është e përjetshme dhe e pathyeshme”, ka deklaruar Haradinaj pas takimit.
Ai gjithashtu theksoi se përkushtimi i Kosovës si vend për të forcuar aleancën me SHBA-në është i palëkundur dhe i përditshëm./Telegrafi/
