Drejtoria për Bujqësi, Zhvillim Rural dhe Pylltari në Komunën e Suharekës ka shpallur thirrjen publike për aplikim në kuadër të programit për mbështetje të fermerëve blegtoral me mëshqerra barëse të racës qumështore Hollshtein Frizis.
Kjo thirrje ka për qëllim përkrahjen e fermerëve lokalë dhe rritjen e prodhimit qumështor përmes kushteve më të avancuara blegtorale, përcjell Telegrafi.
Kriteret kryesore për aplikim
Për të qenë përfitues, fermerët duhet:
Të jenë banorë të Komunës së Suharekës;
Të jenë të regjistruar si fermerë në sistemin elektronik EFR (NIF);
Të kenë 3 deri në 5 lopë qumështore;
Të posedojnë stallë me kushte të rregullta për mirëmbajtje dhe ushqim të mjaftueshëm për kafshët;
Të kenë së paku 2 hektarë tokë bujqësore të punueshme;
Të jenë të gatshëm të nënshkruajnë kontratë me Komunën dhe donatorin.
Dokumentet e nevojshme
Kërkohen:
Kopja e letërnjoftimit,
Lista e verifikimit të gjedheve,
Certifikata e tokës prej së paku 2 hektarësh ose kontrata e qirasë së noterizuar.
Afatet e aplikimit
Aplikimet do të pranohen nga data 24 shtator 2025 deri më 8 tetor 2025 në zyrën pritëse të Komunës së Suharekës. Pas këtij afati, aplikacionet nuk do të shqyrtohen.
Ky projekt realizohet në bashkëpunim me organizatën “Mëshqerra” dhe synon të përforcojë sektorin e blegtorisë në këtë komunë përmes mbështetjes së drejtpërdrejtë të fermerëve. /Telegrafi/
