Gjeloshaj: BE, NATO dhe çështja e pavarësisë së Kosovës janë vija e kuqe e qëndrimit tim në qeveri të Malit të Zi

Zëvendëskryeministri i qeverisë së Malit të Zi për Politikë Ekonomike dhe Ministri i Zhvillimit Ekonomik, Nik Gjeloshaj, në një intervistë për portalin CdM, ka thënë se shumica e shqiptarëve kanë mbështetur hyrjen e Forumit Shqiptar në Qeverinë e Malit të Zi.

Ai tha se shqiptarët i besojnë atij, pasi siç nënvizoi ai, e dinë se në këtë mënyrë u shërben më së miri interesave jo vetëm të shqiptarëve, por të gjithë qytetarëve të Malit të Zi, transmeton Telegrafi.

Gjeljoshaj ka thënë se rrezikimi i parimeve kyçe demokratike, kursi properëndimor i shtetit, anëtarësimi në BE, harmonizimi i plotë i politikës së Jashtme dhe të Sigurisë së Malit të Zi me politikat e BE-së dhe NATO-s, natyrisht edhe çështja e pavarësisë së Kosovës, janë vija e kuqe e qëndrimit të tij në qeveri.

Ai është pyetur nëse ia kanë inat shqiptarët që është në qeverinë e mbështetur nga ZBCG-ja, veçanërisht për shkak të qëndrimeve të qarta të drejtuesve të ZBCG-së ndaj pavarësisë së Kosovës.

“Siç e dini, Forumi Shqiptar është subjekti më i madh politik i shqiptarëve në Mal të Zi dhe si njerëz seriozë e kemi shqyrtuar me kujdes dhe tërësisht vendimin për të marrë pjesë në këtë qeveri dhe kemi arritur në përfundimin se shqiptarët në Mal të Zi duhet të jenë partnerë të vërtetë të të gjithë demokratëve dhe pro- forcat perëndimore në Mal të Zi, në rrugën e saj evropiane dhe euroatlantike. Do t’ju kujtoj se populli shqiptar tregoi pjekuri edhe në raste shumë më të vështira në të kaluarën, që në fund rezultoi një qasje e mirë që vetëm sa çoi në faktin se ne kemi një shoqëri dhe mjedis më të mirë për jetën e të gjithë qytetarëve të Malit të Zi”, tha Gjeloshaj.

Ai gjithashtu bëri të ditur se qeveria e Malit të Zi së shpejti pritet të emërojë ambasadorin e ri në Kosovë.

“Si njerëz të pjekur kemi dhënë mundësinë për të bashkëpunuar dhe na takon të gjithëve të tregojmë nëse do ta shfrytëzojmë këtë mundësi në mënyrën e duhur. E di vetë, do të respektoj çdo shkronjë të marrëveshjes së nënshkruar”, shtoi Gjeloshaj.

Ministri i Zhvillimit Ekonomik në Mal të Zi gjithashtu ka folur për vijat e tij të kuqe që në asnjë mënyrë nuk do të lejonte të kaloheshin.

“Duke pasur parasysh ndjeshmërinë e momentit politik në të cilin operojmë, si dhe ngjarjet gjeopolitike, ka disa “vija të kuqe” që nuk do t’i kalonim. Kryesisht, këto janë ato “vija” që do të ishin në kundërshtim me angazhimet e partisë sonë, dhe para së gjithash rrezikojnë: parimet kyçe demokratike, kursi properëndimor i shtetit, anëtarësimi në BE, harmonizimi i plotë i Politikës së Jashtme dhe të Sigurisë së Malit të Zi me politikën e BE-së dhe NATO-s dhe natyrisht me çështjen e pavarësisë së Kosovës”. /Telegrafi/