FSK-ja mban ushtrime në Mitrovicë, apelohet tek banorët për reduktim të lëvizjeve

Forca e Sigurisë së Kosovës (FSK) do të zhvillojë ushtrime ushtarake në zonën e Mitrovicës, konkretisht në fshatrat Bajgorë, Bare dhe Gumnishtë.

Ushtrimet do të mbahen për tri ditë me radhë, nga data 26 deri më 28 shkurt 2025.

Lidhur me këtë aktivitet, Komuna e Mitrovicës ka lëshuar një njoftim për banorët e këtyre zonave, duke i këshilluar që të kenë kujdes dhe të reduktojnë lëvizjet gjatë ditëve kur do të zhvillohen ushtrimet.

“Të nderuar banorë të fshatrave Bajgorë, Bare dhe Gumnishtë, ju njoftojmë se më datë 26.02.2025, 27.02.2025 dhe 28.02.2025 pjesëtarët e FSK-së do të realizojnë ushtrime në këto fshatra. Ju lutemi të keni kujdes dhe t’i reduktoni lëvizjet në këtë periudhë kohore”, thuhet në njoftimin e Komunës së Mitrovicës.

Këto ushtrime janë pjesë e aktiviteteve të rregullta të Forcës së Sigurisë së Kosovës, të cilat synojnë të përmirësojnë gatishmërinë dhe aftësitë operacionale të trupave.

Zhvillimi i tyre në zona të caktuara të vendit është një praktikë e zakonshme për të siguruar trajnime në kushte sa më reale të terrenit.

Autoritetet lokale i kanë bërë thirrje banorëve që të jenë të informuar dhe të ndjekin udhëzimet për sigurinë e tyre, duke shmangur zonat ku do të zhvillohen ushtrimet.

Në të kaluarën, ushtrime të tilla janë organizuar në rajone të ndryshme të Kosovës, gjithmonë me qëllimin për të rritur profesionalizmin dhe përgatitjen e forcave të sigurisë.

Komuna e Mitrovicës dhe FSK do të jenë në kontakt të vazhdueshëm me banorët për t’i informuar mbi çdo zhvillim të mundshëm gjatë këtyre ditëve./Telegrafi/