Superliga e ka mbyllur edhe javën e 22-të, që i bie të jetë rreth i dytë i garave, ndërsa nuk kanë munguar rezultatet befasuese dhe ndeshjet e forta, që shumë prej tyre u zhvilluan edhe në baltë.
Të dielën Drita ka mposhtur Prishtinën (2-1) në derbin e kësaj jave, ndërsa Llapi ka fituar përballë Gjilanit me rezultatin e njëjtë.
Në ndeshjen e vetme të zhvilluar të shtunën, Ferizaj e ‘tronditi’ Trepçën ’89 duke e mposhtur me rezultat 4-0. Flamurtari ka arritur ta mposht Ballkanin (2-1), duke e bërë sa më interesant garën për titull dhe mbijetesë.
Po ashtu sot fitoi edhe Feronikeli që mposhti Vushtrrinë me rezultat 2-0, ndërsa Drenica mposhti Dukagjini 3-1 si mysafir. Këto rezultate kanë bërë që renditja si në luftë për titull, po ashtu edhe për mbijetesë të mbetet e zjarrtë edhe në fazën e tretë.
Telegrafi ka zgjedhur më të mirët për këtë javë, duke i vendosur në një formacion.
Portier
Donat Kaçiu është kthyer në formë, kur më së shumti iu desh Ferizajt, që në këtë fundjavë mposhtën bindshëm 89-shin.
Portieri prishtinas bëri disa pritje spektakolare duke e mbajtur portën e paprekur.
Mbrojtja
Mbrojtja vjen me tre. Ilir Berisha edhe pse nuk e nisi mirë ndeshjen ndaj Vushtrrinë, ai pastaj u kthye fuqishëm, ku gjeti edhe goli.
Në qendër është Veton Kabashi i Flamurtari, që po ashtu shënoi gol ndaj Ballkanit dhe kishte paraqitje të mirë në mbrojtje.
Në të majtë është Ardian Cuculi i Dritës. Ai ishte një nga pikat më të forta të gjilanasve ndaj Prishtinës, duke shpëtuar një gol të sigurt në pjesën e parë.
Mesfusha vjen me pesë. Hamdi Namani i Dritës, kishte një nga paraqitjet më të mirë prej se ka kaluar në këtë klub.
Arbnor Ramadani për momenti është lojtari më i mirë i Llapit, ndërsa edhe ndaj Gjilanit e gjeti golin.
Bashkim Shala ishte kreator i fitores së Flamurtarit, ku përveç golit, dominoi në mesfushë. Paraqitje të mirë kishte edhe bashkëvendasi i tij që luan te Drenica, Argjend Mustafa, që shënoi dy herë në Klinë.
Më i miri prej më të mirëve këtë javë ishte Taulant Dajaku. Mesfushori i Ferizajt, shënoi dy herë dhe asistoi një herë në fitoren e madhe të skuadrës së tij.
Astri Fazliu ishte emri i involvuar në çdo sulm të Dritës. Ai ndaj Prishtinës shënoi padyshim golin më të bukur të javës, që ia solli tri pikë ekipit të tij.
Me të në krahë është i riu i Llapit, Valmir Veliu. Ai ishte enigmë e pazgjidhur për mbrojtjen gjilanase, duke shkaktuar shumë rrezik.
Trajneri i javës
Synaj Keçi. Trajneri prishtinas kishte gjetur recetën se si të mposhtej Ballkani.
Skuadra e tij ishte dominuese në mesfushë dhe shënoi dy herë ndaj mbrojtjes së çeliktë të Ballkanit.
Formacioni
