Burime ukrainase në rrjetet sociale kanë publikuar pamje të një zjarri në një nga rafineritë më të mëdha në Rusi, në Jaroslavl. Të njëjtat burime pretendojnë se rafineria është goditur në një sulm me dronë, ndërsa guvernatori pretendon se bëhet fjalë për një “defekt teknik”.
Rafineria në Jaroslavl, e njohur si Slavneft-YANOS, ka një kapacitet përpunimi prej rreth 15 milionë tonë naftë në vit, sipas faqes zyrtare dhe të dhënave të industrisë. Kjo e bën atë një nga impiantet më të mëdha të rafinimit në Rusi.
Burimet ukrainase pretendojnë se është goditur njësia VT-6, e cila përpunon vajin e djegies (mazutin), me një kapacitet të supozuar vjetor mbi 6.2 milionë tonë. Rafineria ndodhet rreth 250 kilometra në verilindje të Moskës dhe rreth 700 kilometra larg kufirit me Ukrainën.
Në javët e fundit, Ukraina ka intensifikuar sulmet ndaj rafinerive dhe infrastrukturës së industrisë së naftës ruse duke përdorur dronë, gjë që tashmë ka pasur një ndikim të ndjeshëm në furnizimin me karburant në Rusi. Reuters raporton se sulmet kanë ulur prodhimin, duke i lënë shumë pika të pavarura karburanti pa rezerva në disa rajone.
Ndër të tjera, dronët së fundmi kanë sulmuar sërish kompleksin petrokimik të Gazpromit në Salavat, në rajonin rus të Bashkortostanit. Ky është sulmi i dytë brenda më pak se një jave.
Për shkak të sulmeve gjithnjë e më të shpeshta, Rusia po përballet gjithnjë e më shumë me një krizë furnizimi me karburant. Analistët raportojnë për mungesa të disa llojeve të produkteve të naftës, ndërsa çmimet e benzinës po rriten në të gjithë vendin.
Si pasojë, Moska ka vendosur një ndalim të pjesshëm të eksportit të dizelit deri në fund të vitit dhe ka zgjatur ndalimin e eksportit të benzinës, në përpjekje për të mbrojtur tregun e brendshëm nga kolapsi. /Telegrafi/
