Fëmija flet me vetveten! A duhet të brengoseni apo kjo gjë është në rregull

Nëse keni vërejtur që fëmija juaj bisedon me vetveten, nuk ka arsye për brengosje dhe panik

Nuk është fjala për çrregullimin psikologjik apo për ndonjë problem tjetër, përkundrazi, sjellja e tillë ka anë pozitive, transmeton Telegrafi.

Vogëlushët të cilët flasin me vetveten zhvillojnë shkathtësi të caktuara, arrijnë rezultate shumë më të mira në teste të aftësive motorike në krahasim me fëmijët heshtakë, kanë treguar rezultatet e hulumtimit.

– Fëmijët, derisa janë shumë të vegjël, shpesh flasin me vetveten kur luajnë, shikojnë televizor apo bëjnë aktivitete të tjera ditore, pohon Adam Winsler, profesor i psikologjisë.

Prindërit dhe mësuesit jo rrallë mendojnë që kjo është sjellje e çuditshme apo e keqe.

Mirëpo, bisedat e tilla “private” ndikojnë pozitivisht në zhvillimin e vogëlushëve, por njëherësh u ofrojnë prindërve një pasqyrë të shkëlqyeshme në botën e tyre të brendshme.

Kjo shprehia e fëmijës është normale dhe është një pjesë integrale e zhvillimit të tyre në periudhën nga viti i dytë në të pestin. Sapo ata fillojnë të praktikojnë këtë lloj bisede, komunikimi i tyre me botën e jashtme përmirësohet.

Duhet të theksohet se ata janë fëmijë dhe niveli i tyre i imagjinatës është në të mirë të tyre, një fëmijë që luan, zbulon dhe lejon imagjinatën e tij të fluturojë është një fëmijë i përkryer i lumtur dhe në zhvillim. /Telegrafi/