Fauci jep “lajmin më të mirë në 3 vjet” për amerikanët, që ka të bëjë me COVID-19

Pas tre vjetësh, Shtetet e Bashkuara mund të jenë duke lënë prapa së shpejti pandeminë e shkaktuar nga COVID-19, sipas ekspertit kryesor të sëmundjeve infektive të vendit.

Dr. Anthony Fauci, i cili ka qenë zëdhënësi i përgjigjes së qeverisë ndaj Coronavirusit në dy administratat presidenciale, tha gjatë një interviste të martën se SHBA ishte “me siguri” jashtë fazës së pandemisë, megjithëse ai paralajmëroi se pandemia më e madhe globale ishte ende e pranishme.

“Ne jemi sigurisht tani në këtë vend jashtë fazës së pandemisë”, citohet të ketë thënë Dr. Fauci, përcjell Telegrafi.

Përgjigja e Faucit erdhi menjëherë pasi ai u pyet fillimisht, “Sa afër jemi deri në fund të kësaj pandemie?” Ai e quajti atë një “pyetje pa përgjigje”.

“Ne nuk kemi 900,000 infeksione të reja në ditë dhe dhjetëra e dhjetëra e dhjetëra mijëra shtrime në spital dhe mijëra vdekje. Ne jemi në një nivel të ulët tani”, shtoi Fauci. “Pra, nëse po thoni, a jemi jashtë fazës së pandemisë në këtë vend, ne jemi”.

Këshilltari kryesor mjekësor i presidentit më pas vazhdoi përgjigjen e tij duke thënë se SHBA “nuk do ta zhdukin këtë virus” dhe se qeveria duhet të vazhdojë të “vaksinojë njerëzit”.

Ai sugjeroi që njerëzit mund të duhet të vaksinohen çdo vit në një përpjekje për të mbajtur numrin e infeksioneve sa më të ulët që të jetë e mundur.

Sa i përket pjesës tjetër të botës, Fauci tha se “nuk ka dyshim se kjo pandemi është ende duke qenë prezent”. /Telegrafi/