Fatmir Sheholli zbulon prapaskenat si u bindën Adem Hoxha e Fadil Gashi ta votojnë Vjosa Osmanin

Drejtuesi i Institutit për Afirmimin e Marrëdhënieve Ndëretnike, Fatmir Sheholli ka folur për prapaskenat e bisedimeve të Albin Kurtit me deputetët minoritarë Adem Hoxha dhe Fadil Gashi për të siguruar kuorumin për Vjosa Osmanin.

Sheholli ka thënë se pasi dështoi të shtunën sigurimi i votave për Vjosa Osmanin, të dielën ai takoi përfaqësuesit e komuniteteve.

Por Sheholli thotë se kjo nuk i kërkuar asnjëherë nga Albin Kurti dhe Vjosa Osmani.

Ai ka thënë se nuk e ka bërë punën e ‘sekserit’, por thotë se i takon shoqërisë civile që të merret më këto çështje.

“Instituti i ka katër zyra në tërë territorin e Kosovës dhe ne para se të futeshim në këtë çështje kemi pasur takime të ndryshme jo vetëm këta dy që i përmendët (Adem Hoxha e Fadil Gashi) por edhe deputetët e tjerë. Mirëpo kemi parë nga takimet që do të jetë shumë e vështirë që do të arrihet kuorumi i numrave. Të shtunën nuk u arritën votat, aktivistët e institutit kanë biseduar me Iniciativën Rome. Mua me erdhi mirë. Kanë qenë edhe disa përfaqësues të Listës Serbe”, tha ai në Prime Time të Kanal 10.

Ai ka thënë se atë ditë deputeti goran, Adem Hoxha e ka pasur vazhdimisht telefonin e shkyçur.

“Ai e ka shprehur bindjen e tij që të marrin pjesë në seancë. z.Gashi më ka thënë, se unë e di që ka lidhje të ngushta me listën Guxo. Unë jam angazhuar që të shohim ku janë këta njerëz dhe pse nuk po vijnë. Informacionet kanë qenë që Adem Hoxha ka marrë premtime nga Kurti, por ato nuk janë vendosur në letër. Kam marrë vesh që Hoxha do të vinte në seancë nëse rregullohet çështja e zëvendësministrit”, tha Sheholli.

Sheholli ka theksuar se Kurti dhe Adem Hoxha janë takuar të dielën në ora 15:00.

“Unë e di që takimi ka qenë në ora tre atë ditë dhe çka ka pasur në takim mes Hoxhës dhe Kurtit është mirë t’i pyesni ata, por Hoxha ka marrë pjesë në seancë dhe ka votuar si Fadil Gashi. Unë nuk i them kësaj tregti sepse ata janë deputetë që kanë ardhur në seancë dhe kanë votuar. Kur Kurti është marrë vesh me Adem Hoxhën atëherë ka pranuar edhe z. Gashi”, është shprehur ai.