Presidenti Hashim Thaçi, gjatë ditës së djeshme por edhe sot ka zhvilluar takime të pandërprera me liderë të partive politike.
Mbrëmë është zhvilluar edhe takimi i tij me liderin e LDK-së, Isa Mustafa. Për këtë takim zëdhënësi i LDK, Besian Mustafa, i ka thënë Telegrafit, se vet Presidenti Thaçi ka kërkuar takim me kreun e LDK-së, Isa Mustafa.
Sipas tij, presidenti e ka njoftuar Mustafën, rreth vizitës së dy zyrtarëve nga SHBA-ja dhe kërkesave të tyre drejtuar koalicionit qeverisës.
Ndërkaq, sot siç mëson Telegrafi nga burime në Presidencë është mbajtur edhe një takim shumë i gjatë sërish me dy emisarët e Shtëpisë së Bardhë, ku pjesë e këtij takimi kanë qenë edhe Ekipi Negociator dhe pothuajse të gjithë liderët e koalicionit qeverisës.
Ky takim i shumicës së liderëve politikë me Drejtorin për Çështje Evropiane në Këshillin e Sigurisë Kombëtare të SHBA-së, John Erath, si dhe me Drejtorin për Ballkan të Këshillit Kombëtar të Sigurisë së SHBA-së, Brad Berkley, ka zgjatur rreth 3 orë në zyrën e presidentit Thaçit.
Të kontaktuar nga Telegrafi, zyrtarët nga kabineti i presidentit nuk kanë dashur të flasin rreth kësaj çështjeje. Ata nuk e kanë mohuar takimin e sotëm, por kanë thënë se çfarëdo që kanë pasur të thonë rreth vizitës së zyrtarëve amerikanë, e kanë thënë dje përmes komunikatës zyrtare.
Po ashtu, Telegrafi ka tentuar të marrë qëndrimet e anëtarëve të Ekipit Negociator për këtë takim, por të njëjtit nuk janë përgjigjur./Telegrafi/
