Një grua e re nga fshati Gërmovë e Vitisë ka humbur jetën si pasojë e një aksidenti trafiku trafiku, i cili ka ndodhur të mërkurën mbrëma.
Komuna e Vitisë ka njoftuar se bëhet fjalë për Jehona Sylejmanin.
Kryetari i kësaj komune, Sokol Haliti i ka shprehur ngushëllime familjes Sylejmani dhe të gjithë atyre që e kanë njohur të ndjerën.
“Me dhembje të thellë pranuam lajmin për humbjen tragjike të Jehona Sylejmanit nga fshati Gërmovë e Vitisë. Në këto çaste të vështira, të pikëllimit ne ju shprehim ngushëllimet më të sinqerta familjes dhe të gjithë atyre që e njohën atë dhe bashkëndjejmë me ju në këto çaste të pikëllimit. Ngushëllime!”, ka thënë ai.
Ndryshe, Policia e Kosovës ka konfirmuar se viktima ka humbur kontrollin mbi veturën që e drejtonte duke u përplasur me një autobus që po lëvizte në kahjen tjetër të rrugës.
Në raportin 24 orësh bëhet e ditur se rasti ka ndodhur të mërkurën rreth orës 21:28 në fshatin Gërmovë të Vitisë.
Ndërkaq, me vendim të prokurorit trupi i pajetë është dërguar në obduksion. /Telegrafi/
