Dogana e Kosovës thyen rekordin e të hyrave

Fillimi i muajit nëntor shënoi një arritje historike për Doganën e Kosovës, me mbledhjen e mbi 1.5 miliardë eurove të hyra.

Kjo shifër përfaqëson një rritje mbresëlënëse prej 10.5% krahasuar me të njëjtën periudhë të vitit të kaluar.

Gjatë njëmbëdhjetë muajve të parë të vitit 2023, të hyrat e mbledhura ishin 1.36 miliardë euro, ndërsa këtë vit shuma është rritur me 146.1 milionë euro.

Ky trend pozitiv, i nisur vitin e kaluar, ka vazhduar të përforcohet edhe në vitin 2024, duke reflektuar përkushtimin e Doganës për maksimizimin e të hyrave.

Faktorët që ndikuan në këtë sukses përfshijnë:

Përmirësimi i Procedurave Doganore; Implementimi i teknologjive të avancuara dhe procedurave të thjeshtuara ka kontribuar në rritjen e efikasitetit të procesit.

Lufta Kundër Kontrabandës; Masa të shtuara në bashkëpunim me institucionet tjera kanë ulur ndjeshëm aktivitetet ilegale dhe kanë shtuar të hyrat.

Rritja e Transparencës; Fushatat e ndërgjegjësimit për publikun dhe bizneset mbi përputhshmërinë ligjore kanë sjellë një përmirësim të përgjithshëm në përputhshmëri, duke përfituar gjithë ekonomia.

Dogana e Kosovës thotë se mbetet e angazhuar për të vazhduar kontrollet rigoroze dhe bashkëpunimin me autoritetet kompetente për të mbrojtur ekonominë dhe sigurinë e vendit.

Institucioni inkurajon qytetarët që të raportojnë çdo veprim të dyshimtë apo të paligjshëm përmes numrit pa pagesë 0800 50095, për të ruajtur integritetin dhe transparencën e shërbimeve të saj./Telegrafi/