Diplomon gjenerata e 57-të e Policisë së Kosovës, krerët e institucioneve zotohen për mbështetje

Në një ceremoni sot kanë diplomuar 433 kadetë të rinj të gjeneratës së 57-të të Policisë së Kosovës, në mesin e tyre edhe 53 gra.

Presidentja Vjosa Osmani ka deklaruar se këta kadetë janë ata që garantojnë siguri dhe mjedis të sigurt për të gjithë qytetarët pa dallim.

“Ju duhet të jeni qytetar model të Republikës së Kosovës të cilët përkujdesen ta zbatojnë ligjin ta luftojnë krimin ta ruajnë rendin dhe të shërbejnë si kujdestar të sigurisë publike”, ka thënë Osmani.

Presidentja ka shtuar se në mesin e të diplomuarve janë 17 serbë, 5 boshnjakë, 2 goran, një turk dhe një rom.

“E në mesin e këtyre kadetëve janë 53 vajza e gra të guximshme e të përkushtuara për ti shërbyer vendit të tyre. Kjo pjesëmarrje e grave në polici reflekton angazhimin e përbashkët e serioz që të rritet numri i pjesëmarrjes së grave në polici. Është koha që gratë të jenë në krye të detyrave e funksioneve më të larta”, ka thënë Osmani.

Osmani ka shtuar se kadetët duhet të jenë krenar me uniformën që kanë veshur.

“Kam besimin e fuqishëm që do ti qaseni detyrave tuaja me seriozitet”, tha Osmani.

Në anën tjetër kryeministri Albin Kurti, ka shtuar se për Qeverinë tonë, mbrojtja dhe siguria e vendit dhe vendosja e rendit dhe ligjit, janë prioritet.

“Policia qëndron e palëkundur në misionin e ruajtjes së rendit dhe sigurisë publike”, ka thënë Kurti, duke shtuar se jemi të lumtur që policia renditet ndër tri institucionet më të besueshme për qytetarët.

Kurti ka theksuar se policët kanë treguar se nuk bëjnë kompromis me bandat dhe krimin.

“Kolegët tuaj me angazhimin e tyre kanë treguar se nuk bëjnë kompromis me bandat edhe krimin. Janë sulmuar janë plagosur por nuk janë dorëzuar, përkundër kësaj ata janë akoma aty në krye të detyrë”, ka thënë Kurti.

Kryeministri u është drejtuar kadetëve të cilët diplomuan që ti qëndrojnë besnik betimit të tyre dhe vendit.

“Kujtojmë kolegët tuaj që nuk u dorëzuan përballë asgjëje duke zbatuar misionin e përbashkët. Rënia e tyre në mbështetje të sovranitetit tonë shtetëror, e kundër krimit e paligjshmërisë mbetet shembull i dashurisë së pakushte për Republikën tonë”, u shpreh Kurti, duke thënë se institucionet do t’ju ofrojnë mbështetje.

Ministri i Brendshëm, Xhelal Sveçla ka thënë se sot është një ditë krenarie.

“Keni zgjedhur t’i shërbeni atdheut tonë të përbashkët dhe qytetarëve të saj. 433 vajza e djem të ri po i bashkohen policisë, institucionit kyç të shtetit tonë për mbrojtjen e integritetit e sovranitetit të vendit e luftimit të pa kompromis të krimit e korrupsionit”, ka thënë Sveçla.

Ministri ka shtuar se ky profesion kërkon zotim për të shërbyer me ndershmëri.

“Po i bashkoheni policisë në kohën më të nevojshme për vendin. Jam besimplotë se do të jeni nderi dhe krenaria e brezave dhe gjeneratave që do t’iu pasojnë”, tha Sveçla.

Sveçla pati edhe një kërkesë për kadetët e rinj: “çdo ditë kur vishni uniformën kujtoni betimin që do ta jepni sot. Mbani në mend se askush nuk është mbi të drejtën dhe se ligji është për të mbrojtur qytetarin. Duhet të jeni në zbatim të ligjit çdo ditë”, tha ministri. /Telegrafi/