Detaje të reja për masakrën e Las Vegasit: Sulmuesi kishte marrë me qira dhoma edhe në Chicago, ku zhvillohej festivali i muzikës Lolapaluza

Disa muaj para se të kryente masakrën më të tmerrshme në historinë e SHBA-ve, sulmuesi Stephen Paddock kishte marrë me qira disa dhoma tjera afër festivaleve tjera të muzikës country siç ishte ai në Las Vegas dhe në Chicago, ka njoftuar policia.

Mediat amerikane raportojnë se Paddock kishte rezervuar dy dhoma në Chicago me pamje kah festivali Lolapaluza, i cili një herë në vit mbledh mijëra njerëz, transmeton Telegrafi.

Megjithatë, Paddock nuk kishte fjetur në këto dhoma, dhe nuk dihet nëse gjatë atij vikendi kishte qenë në Chicago.

Në emër të tij, gjithashtu ishin rezervuar dhoma tjera në një hotel në Las Vegas që kishin pamje kah festivali i muzikës country, më saktë këtë gjë e kishte bërë një javë para se të vriste 58 persona dhe plagosur qindra tjerë, ka njoftuar sherifi i policisë së Las Vegasit, Joseph Lombardo.

Nëpunësit e hotelit Mandalay Bay nga i cili Paddock kishte shtënë mbi turmën para se të kryente vetëvrasje, kanë pranuar se sulmuesi kishte kërkuar një dhomë në katin më të lartë me pamje kah festivali i muzikës country “Route 91 Harvest”.

Ndërkaq hetuesit në SHBA, janë duke u munduar të zbulojnë motivin që qoi te kjo masakër e përgjakshme.

Presidenti Donald Trump ka vizituar gjatë të enjtes Las Vegasin, ku është takuar me familjet e viktimave, policinë dhe  stafin e spitaleve. Ai i ka falënderuar të gjithë për reagim të shpejtë.

“Sot kam qenë dëshmitar i profesionalizmit. Për këtë jemi krenar që jemi amerikanë”, ka deklaruar i pari i Shtëpisë së Bardhë.

Ndërkohë, sherifi i policisë në Las Vegas ka deklaruar se janë duke u munduar të intervistojnë të gjithë ata që kishin njohur sulmuesin, për të konstatuar nëse kishte pasur pjesëmarrës tjetër në këtë sulm.

Gjithashtu ka pranuar se Paddock për më shumë se 10 vite kishte bërë një jetë “të fshehtë”, dhe se me kujdes të madh kishte fshehur aktivitetet e tij.

Sipas raportit fillestar të hetimeve, pasi që policia është futur në dhomën e tij kanë gjetur gjurmë, që i ka bërë të besojnë se sulmuesit kishte planifikuar të largohet nga vendi i ngjarjes pas sulmit. Por, pasi që kishte ndryshuar rrjedha e ngjarjeve, ai kishte kryer vetëvrasje kur është futur policia në dhomën e hotelit ku ai po qëndronte. /Telegrafi/