Dëshmia tronditëse e edukatores: Fëmijët rriheshin gjatë tërë kohës, i fusnim nën çarçaf e i godisnim që të mbeteshin shenjat! (Video)

Rriheshin sepse nuk bindeshin, sepse ishin kokëfortë, apo sepse hanin me duar. Këto ishin disa nga arsyet e dhunës barbare që ushtrohej ndaj fëmijëve të mitur në kopshtin “Diren”, të Anjeza Shabani.

Një javë pas transmetimit të pamjeve tronditëse në ekranin e Televizionit Klan, ku Shabani shfaqej duke dhunuar një fëmijë vetëm tre vjeç, emisioni investigativ “STOP” sjell një tjetër video, të një prej edukatoreve që punonte në këtë kopsht.

Bëhet fjalë për një kamera të fshehtë, ku edukatorja në fjalë pranon dhunën sistematike që i ushtrohej fëmijëve në këtë institucion privat nga administratorja Anjeza Shabani, por jo vetëm.

Ajo tregon se edhe një ish-punonjësje, Elona Turdiu, ushtronte gjithashtu dhunë ndaj të vegjëlve dhe rrëfen se dikur “rriheshin masivisht”.

Edukatorja tregon mënyrat që Shabani përdorte për të fshehur dhunën dhe se trevjeçari nuk ishte i vetmi fëmijë që vuante.

Siç rrëfen edukatorja në video, shpesh fëmijët mbuloheshin me çarçaf dhe më pas goditeshin që të mos dalloheshin shenjat. Një tjetër zgjidhje, për të fshehur shenjat e kuqe në trupin e të vegjëlve ishte përdorimi i një sprei, me të cilin i lyenin fëmijët pasi i rrihnin.

Edukatorja konfirmon gjithashtu pasojat e rënda që ka lënë kjo dhunë barbare tek fëmijët, duke sjellë rastin e një të mituri, që po trajtohet nga një psikologe, pasi ngrihet në gjysmë të natës i tronditur e duke ulëritur. /tvklan.al/