Deputetja Balje denoncoi një rast rrahjeje në Prizren, policia jep detaje

Dy persona janë dërguar mbrëmë në Stacionin Policor të Kosovës në Prizren për intervistim, pasi mes tyre kishte shpërthyer një konflikt fizik.

Lajmin e ka konfirmuar zëdhënësi i Policisë për rajonin e Prizrenit, Shaqir Bytyqi.

Sipas tij, rasti ndodhi rreth orës 22:30 në Qendrën Sportive në Prizren, ku një i ri sulmoi fizikisht një roje sigurie, e më pas mori përgjigjen nga ai.

“I dyshuari H.M. tentoi të futej në një hapësirë të rezervuar për mysafirët e ftuar, ku hasi në kundërshtimin e rojes së sigurimit. Në këtë moment, i dyshuari e goditi me grusht në fytyrë punëtorin e sigurimit, i cili iu kundërpërgjigj duke e sulmuar fizikisht,” tha Bytyqi.

Të dy personat pësuan lëndime të lehta trupore dhe u liruan pas intervistimit në procedurë të rregullt.

Ngjarja ka nxitur reagimin e deputetes së Kuvendit të Kosovës, Duda Balje, e cila përmes një postimi publik ka denoncuar sulmin, duke e cilësuar si dhunë të papranueshme në një ditë që kishte për qëllim festimin e Ditës së Boshnjakëve.

“Në koncertin e mbajtur me rastin e Ditës së Boshnjakëve, një djalë 20-vjeçar u rrah vetëm sepse dëshironte t’u bashkohej të tjerëve në podium. Dhuna ndaj tij nuk është vetëm shkelje fizike, por edhe dhunim i të drejtave elementare që duhet t’i ketë çdo qenie njerëzore,” ka shkruar ajo.

Deputetja u bëri thirrje autoriteteve që të merren me këtë rast, duke kërkuar ndëshkimin e përgjegjësve për të siguruar se incidente të tilla nuk do të përsëriten.

“Në këtë ditë, ku duhej të festonim së bashku, të drejtat themelore të një të riu u shkelën me brutalitet. Organet përkatëse duhet të veprojnë me seriozitet,” përfundoi Balje./Telegrafi/