Demiri: UDB-ashi Nexhmedin Ajeti më thoshte vishu trashë që të mos mbesin shenjat e pendrekut në trup

Ish e burgosura politike, Vezire Demiri ka thënë se Nexhmedin Ajeti ishte UDB-ashi i cili përdori tortura çnjerëzore ndaj saj në burgun e Mitrovicës.

Ajo ka rrëfyer se si Ajeti i thoshte veshu trashë që të mos mbesin shenjat e ‘pendrekut’ (shkopit të gomës) në trup gjatë torturave.

“Nexhmedin Ajeti, vëllau i drejtorit të burgut, Ajet Ajeti përdorte dhunë. Më thoshte veshu më trashë, tri katër parë tesha, që mos të mbetet pendreku në trup”, ka rrëfyer Demiri.

Demiri ka thënë se përveç Nexhmedin Ajetit në Mitrovicë ajo ishte marrë në pyetje edhe nga një person me emrin Muharrem, për të cilin tha se nuk përdori dhunë por u soll mirë me të.

Sipas Demirit, dhunë më së shumti ka përdorur në burgun e Mitrovicës, Nexhmedin Ajeti dhe disa gra që ishin si police.

“Ka qenë Fevzija, ajo jo që ka qenë UDB-ashe, por 10 UDB-ashe i ka pas në trup të saj. Mbiemrin nuk ia di, me sa e di ka qenë e Bajrit. Ka qenë edhe një Minirja, ajo ka qenë kryesore aty. Tmerret e saja sa të jam nuk i harroj”.

Dita më e tmerrshme për Vezire Demirin gjatë vuajtjes së dënimit ishte qëndrimi në Pejë në natën e parë kur ishte arrestuar.

“Nata e 4 nëntorit 1985…. I dëgjojsha rënkimet, britmat. Më dukej që edhe shiu po vajton për ato rënkime të rinjve që u dergjshin nëpër ato burgje, nëpër ato dhoma, ka qenë tmerr. Kjo ma kujton një andërr të keqe. Nuk kam dëshirë kurrë me i kujtu ato. Është një makth”, ka thënë ajo me sy të përlotur.

Demiri ka thënë se për 6 muaj ishte mbajtur nën hetime.

“Për sa dënoheshim ne nuk e kishim fort problem, vitet kalonin shumë shpejt, ditët, muajt por vetëm hetuesia me kalu njëherë. Në hetuesi është shumë vështirë me nejt… Nuk e pret kur të vinë, natën, ditën… Në mes natës vijshin kur ti ishe e përgjumur… Ndoshta s’ishe në gjendje me fol. Nuk ishe në gjendje me mendu”.

Ajo ka thënë se gjyqtar i rastit të saj ishte Gani Rexha derisa prokurori nuk i kujtohet se kush ishte dhe se nga Rexha ajo tregon se u dënua me 1 vit e gjysmë burgim.

“Pas gjashtë muajsh dola para gjyqit. Gjyqtari Gani Rexha më dënoi me 1 vit e gjysmë burg. Deri në 1986 mbajta burg. Krejt burgun, pra dënimin e kam kryer në Mitrovicë”, ka theksuar Demiri. /Dukagjini/