D Plus: Komuna e Prishtinës shkeli ligjin në kontratën 12 milionëshe për “Shërbimi i Arkitektit të Kryeqytetit”, njëri prej anëtarëve të komisionit nuk ishte pjesë e komunës

Komuna e Prishtinës shkeli ligjin në kontratën 12 milionëshe për “Shërbimi i Arkitektit të Kryeqytetit”, duke caktuar në komision të vlerësimit të ofertave një person i cili nuk ishte pjesë e Komunës së Prishtinës.

Anëtari i komisionit për vlerësimin e tenderëve, z.Kreshnik Ferizi, nuk ishte pjesë e Komunës së Prishtinës, duke qenë se kontrata e tij me Komunën e Prishtinës kishte përfunduar me datën 31.12.2022. Këtë sipas oranizatës Demokracy plus (D+) e ka konfirmuar nga Zyra e Burimeve Njerëzore në Komunën e Prishtinës, transmeton Telegrafi.

Edhe Ardit Dragusha hulumtues nga D+, për Telegrafin tha se personi i cili ka qenë anëtar i Komisionit për Vlerësimin e Tendereve, nuk ka pasur asnjë angazhim në Komunën e Prishtinës dhe sipas tij kjo është shkelje e rëndë.

“Në bazë të dokumenteve, kemi konfirmuar se një anëtar i cili ka qenë në Komision të Vlerësimit të tenderëve, nuk ka qenë zyrtar publik, ndërkohë anagazhimin e vetëm me Komunën e Prishtinës, e kishte pasur deri në dhjetor të vitit 2022, përmes një kontrate të paligjshme, të njohura për publikun si kontratat mbi vepër. Në kohën kur ky person, mori pjesë në Komisionin e Vlerësimit të tenderit, ku edhe u shpërblye me kontratë një konzorikum, ku ky vetë kishte qenë bashkëpuntorë, nuk kishte asnjë lloj angazhimi me Komunën e Prishtinës, dhe kjo gjë është shkelje e rëndë e Ligjit të Prokurimit Publik si dhe konflikt i interesit”, tha ai.

Sipas tij, pas këtij hulumtimi Komuna e Prishtinës do të duhej ta anulonte kontratën.

“Komuna e Prishtinës duhet të tregohet proaktive, duke anuluar këtë kontratë e cila është dhënë në mënyrë të paligjshme, pasi në këtë situatë rrezikon padi nga operatorët e tjerë ofertues, të cilët kanë të drejtë të bëjnë padi për një proces i cili nuk e ka përfillur ligjin”, tha ai.

Edhe në një njoftim për media nga D+, thuhet se në grupin e operatorëve që u shpallën fitues nga komisioni vlerësues, figuronte si bashkëpunëtor, Kreshnik Ferizi.

“Përveç pjesëmarrjes së paligjshme në komision të vlerësimit të tenderit, ekziston dyshimi i bazuar për konflikt të interesit, duke qenë se grupi i operatorëve ekonomikë “Shërbimi i Arkitektit të Kryeqytetit (Ardi CC L.L.C; Anarch Sh.P.K) të cilët u shpallën fitues nga komisioni vlerësues ku anëtar ishte z.Kreshnik Ferizi, ofertuan me dokumentacion, ku vetë z.Kreshnik Ferizi figuronte si bashkëpunëtor i kompanisë “Anarch Sh.P.K””, thuhet në njoftim.

Ndryshe sipas D+, Komisioni i vlerësimit të tenderit për kontratën “Shërbimi i Arkitektit të Kryeqytetit”, përfundoi raportin dhe vlerësimin e ofertave me datën 29.05.2023, pesë muaj pas përfundimit të angazhimit të z.Kreshnik Ferizit me Komunën e Prishtinës. /Telegrafi/