Manchester City e ka rikthyer interesimin për Joao Cancelon, derisa Juventusi po kërkon 50 milionë euro nga shitja e portugezit.
Mbrojtësi i talentuar thuhet se nuk është pjesë e planeve të Maurizio Sarrit, andaj në këtë verë Zonja e Vjetër është e gatshme ta shesë atë.
Sipas Sportitalia, Manchester United dhe Pari Saint-Germain janë po ashtu në garë për transferimin e Cancelos, mirëpo Citizens po i prijnë garës.
Joao Cancelo (Foto: Juventus FC/Twitter)
Mediumi italian bën të ditur se kampioni i Ligës Premier po tenton që ta mbyll transferimin e portugezi në këto pak ditë, para se të mbyllet afati kalimtar më 9 gusht në Angli.
Fillimisht negociatat ishin ndërprerë, pasi Manchester City kishte tentuar që në marrëveshje ta fuste Danilon, mirëpo Bianconerët e refuzuan ofertën.
Tani, skuadra angleze thuhet se do t’i ofrojë deri në 40 milionë euro dhe bonuset për ta mbyllur transferimin e reprezentuesit të Portugalisë. /Telegrafi/
