“Chiesa dhe Barella mund të luanin edhe në 2006-tën, Dimarcon do ta zëvendësoja menjëherë” – Totti flet pas ndeshjes me Shqipërinë

Francesco Totti beson se Federico Chiesa dhe Nicolo Barella do të ishin përshtatur perfekt në skuadrën e Italisë që fitoi Kupën e Botës në vitin 2006, por bën shaka duke thënë se do të kishte hequr dorë nga Federico Dimarco pas një rivënie të dobët kundër Shqipërisë.

Sulmuesi legjendar italian Francesco Totti komentoi debutimin e Azzurrëve në EURO 2024 gjatë një eventi në Romë të dielën, shkruan Sky Sport Italia.

Një nga pyetjet e ish-sulmuesit ishte për lojtarët që do të kishin qenë pjesë e skuadrës së Azzurri në vitin 2006 kur Totti dhe shokët e tij fituan Kupën e Botës.

“Tre ose më shumë, ndoshta edhe më shumë. Sigurisht, Chiesa dhe Barella do t’i ishin përshtatur në mënyrë të përkryer atij ekipi. Të fitosh Kupën e Botës është ëndrra e çdo lojtari”, deklaroi Totti.

Totti vlerësoi gjithashtu Gianluca Scamacca, një produkt i akademisë së Romës, duke thënë se ai është “një sulmues i mirë” dhe “një bishë” fizikisht.

Megjithatë, Totti shprehu shqetësimin për paraqitjen e Dimarco kundër Shqipërisë pasi një rivënie të dobët nga mbrojtësi i Interit i kushtoi Italisë një gol në fazat e hershme.

“Kjo është arsyeja pse nuk mund të bëhesha trajner. Unë do të zëvendësoja menjëherë një lojtar që bën një gabim të tillë”, deklaroi Totti me shaka.

Por ish sulmuesi i njohur, kishte edhe fjalë të mira për mbrojtësin anësor të Italisë.

“Dimarco është përmirësuar shumë këtë sezon, përveç kësaj ndeshjeje, por më pas ai e kompensoi atë që bëri”, përfundoi Totti.

Totti, tani  47-vjeçar shënoi nëntë gola në 58 paraqitje me kombëtaren e Italisë. /Telegrafi/