Kapiteni i Barcelonës, Sergio Busquets, ka thënë për mediat se do të konfirmojë dëshirën e tij për të qëndruar ose larguar nga klubi këtë javë.
34-vjeçarit i skadon kontrata këtë verë dhe ka qenë i lidhur fort me një lëvizje në Arabinë Saudite ose Inter Miami në Major League Soccer, nëse ai vendos që epoka e tij në Barcelonë të përfundojë.
Busquets ka mbetur një pjesë e rëndësishme e ekipit të parë te Barcelona këtë sezon, pranë Frenkie de Jong në mesfushë, pavarësisht thirrjeve të shumta që ai të zëvendësohet sezonin e kaluar.
Duke folur për DAZN pasi Barcelona mposhti Osasunën 1-0 të martën mbrëma, Busquets shpjegoi se ishte pak a shumë i vendosur në mendjen e tij.
“E kam pak a shumë në mendje të ardhmen time tashmë, tani ka disa ditë pushimi dhe kur të kthehem ndoshta do ta njoftoj trajnerin”, ka thënë Busquets.
Busquets ka gjetur një vend në ekosistemin e Xavi Hernandez këtë sezon dhe u tregua i dobishëm.
Në varësi të pagës së tij, e cila mendohet se do të reduktohet shumë nëse qëndron, ai mund të jetë një lojtar i dobishëm sezonin e ardhshëm. /Telegrafi/
