Burri nga Kanadaja pësoi lëndime të rënda pasi “u hodh mbi ariun polar” për të mbrojtur gruan e tij nga sulmi

Një burrë në veriun e largët të Kanadasë u hodh mbi një ari polar për të mbrojtur gruan e tij nga lëndimi.

Sipas mediave të huaja, përcjell Telegrafi, burri i paidentifikuar pësoi lëndime të rënda, por pritet të shërohet, sipas Shërbimit Policor të Nishnawbe Aski.

Çifti u largua nga shtëpia e tyre rreth orës 05:00 me orën lokale të martën për të gjetur qentë e tyre, kur një ari – i cili ishte në rrugën e shtëpisë së tyre – sulmoi gruan.

Incidenti ndodhi në Fort Severn First Nation, një komunitet i vogël me rreth 400 njerëz në veriun e largët të Ontarios.

“Gruaja rrëshqiti në tokë ndërsa burri i saj u hodh mbi kafshën për të parandaluar sulmin e saj”, tha policia në një deklaratë. ”Më pas ariu sulmoi mashkullin, duke i shkaktuar lëndime të rënda, por jo të rrezikshme për jetën në krah dhe këmbë”.

Pas kësaj, një fqinj mbërriti me armë dhe qëlloi disa herë ariun.

Ai u tërhoq në pyllin aty pranë ku ngordhi nga plagët e marra.

Policia e Nishnawbe Aski tha se “vazhdoi të patrullonte zonën për t’u siguruar që asnjë ari tjetër nuk po bridhte në komunitet”.

Alysa McCall, një shkencëtare në Polar Bear International, i tha Korporatës Kanadeze të Transmetimeve (CBC) se arinjtë polarë rrallë sulmojnë njerëzit. /Telegrafi/