Bislimi me disa vërejtje për Raportin e Progresit: Janë disa arritje që është dashur të vlerësohen dhe theksohen më shumë në këtë raport

Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, është takuar me ambasadorin e BE-së në Kosovë, Tomas Szunyog.

Ambasadori Szunyog ia ka dorëzuar zëvendëskryeministrit Bislimi, Raportin për Vendin 2023 për Kosovën nga Komisioni Evropian.

Bislimi ka thënë se raporti konstaton se Qeveria ka vazhduar me reforma për anëtarësim drejtë Bashkimit Evropian

“Raporti adreson për herë të parë vendimin final të Bashkimit Evropian që qytetarëve të Kosovës të iu mundësohet lëvizja pa viza nga 1 janari i vitit 2013”.

Ai thotë se raporti përgëzon Kosovën për politikën e saj të jashtme për luftën në Ukrainë dhe sanksionet e vendosura ndaj Rusisë dhe Bjellorusisë.

Bislimi thotë se raporti konstaton se Kosova ka progres në fushën e doganave, tatimeve, politikave sociale arsimit e kulturës dhe energjisë.

“Sektorin financiar e kemi të qëndrueshëm përkundrejt krizave të njëpasnjëshme. Kemi ulje të ndjeshme të papunësisë nga 19% në 11.8%”, ka shtuar Bislimi.

Lexo po ashtu Szunyog: E ardhmja e Kosovës është drejt BE-së, por të vazhdohet me reformat

Zëvendëskryeministri i parë ka shprehur edhe një pakënaqësi që në raportin e Progresit nuk janë të përfshira disa arritje që sipas tij janë mjaft të rëndësishme.

“Sipas analizës sonë, janë disa arritje në segmentin e kritereve politike, përkatësisht në fushën e demokracisë, drejtësisë dhe sundimit të ligjit, luftimit të korrupsionit dhe administratës publike që është dashur të vlerësohen dhe theksohen më shumë në këtë raport, meqë janë të arritura shumë të rëndësishme në një shoqëri demokratike dhe për më tepër janë rekomanduar në raportin e vitit të kaluar”.

“Disa nga këto të arritura janë: Ligji për zgjedhje të përgjithshme, Ligji për financimi e partive politike, rregullorja e re e Kuvendit, Ligji për Qeverinë e Kosovës, Ligji për pagat në sektorin publik, Ligji për zyrtarët publik, Ligji për Prokurorin e Shtetit, Gjykata Komerciale, rritja e numrit të Gjyqtarëve, Ligji për parandalimin e dhunës në familje”, ka deklaruar tutje Bislimi./Telegrafi/