Bill Gates kritikon ashpër Donald Trumpin

Filantropi amerikan, Bill Gates ka lobuar personalisht te zyrtarët e administratës së presidentit amerikan, Donald Trumpit për të vazhduar financimin e programeve shëndetësore në mbarë botën.

Ai gjithashtu ka paralajmëruar se fondacioni i tij nuk mund të mbulojë të gjitha shpenzimet që kanë lindur për shkak të reduktimeve nga Uashingtoni.

Gates është takuar në javët e fundit me përfaqësues të Këshillit të Sigurisë Kombëtare, si dhe me kongresistë të partive Demokratike dhe Republikane, për të apeluar që financimi të vazhdojë, raporton reuters, duke iu referuar dy burimeve anonime të njohura.

Gjatë këtij takimi, ai theksoi se fondacioni i tij nuk mund të zëvendësojë rolin që ka qeveria e Shteteve të Bashkuara të Amerikës.

Lexo po ashtu Bill Gates paralajmëron për një pandemi "shumë më të rëndë" në vitet e ardhshme

Një zëdhënës i “Fondacionit Gates” konfirmoi se miliarderi ka qenë kohët e fundit në Uashington për të diskutuar me krijuesit e politikave mbi “ndikimin shpëtues” të ndihmës amerikane dhe nevojën për një plan strategjik për të mbrojtur ata që janë më të rrezikuarit në mbarë botën.

Prioritetet e “Fondacionit Gates”, si eliminimi i paralizës tek fëmijët dhe lufta kundër malaries, janë kërcënuar për shkak të reduktimeve të administratës së re.

Siç raportohet, Gates ka kërkuar gjithashtu që Shtetet e Bashkuara të vazhdojnë të mbështesin Organizatën Botërore të Shëndetësisë.

Presidenti amerikan vendosi menjëherë pas inaugurimit të tij më 20 janar të shpallë mbylljen e agjencisë amerikane për bashkëpunim ndërkombëtar USAID dhe të ngrijë miliarda dollarë ndihmë për të gjitha programet, përfshirë ndihmën për vendet më pak të zhvilluara në furnizimin me ushqim dhe parandalimin e sëmundjeve, përkujton agjencia britanike. /Telegrafi/