BIA thotë se nuk e ka rrahur brutalisht Sanduloviqin, por paralajmëron secilin që promovon pavarësinë e Kosovës

Nikola Sanduloviq ka publikuar në platformën X një video të vizitës së tij në varrezat e familjes Jashari në Kosovë, ku ka vendosur kurorë dhe ka kërkuar falje për vrasjen e 50 anëtarëve të familjes së Adem Jasharit, një prej themeluesve të UÇK-së.

Presidenti i Partisë Republikane u arrestua një ditë më vonë dhe përfundoi në paraburgim, ku u rrah brutalisht prej pjesëtarëve të  Agjencisë për Siguri dhe Informim të Serbisë (BIA).

Megjithatë, BIA i mohon pretendimet e kreut të Partisë Republikane të Serbisë dhe thekson se gjatë ndërmarrjes së aktiviteteve në kuadër të punës së Agjencisë të përcaktuara me ligj, nuk ka pasur shkelje të lirive dhe të drejtave, as nuk ka pasur përdorim të kundërligjshëm të forcës fizike ndaj politikanit serb, raporton danas.

Lexo po ashtu Publikohet videoja e Nikola Sanduloviqit - ai shihet në gjendje të rëndë dhe pavetëdije gjersa largohet nga spitali

Anëtarët e BIA-s ndërmorën aktivitete që synonin sqarimin e historisë së veprimtarisë së paligjshme të Sanduloviqit, të cilën prokurori kompetent e cilësoi si vepër penale të nxitjes së urrejtjes dhe intolerancës kombëtare, racore dhe fetare nga neni 317 i KP të RS-së, thuhet në njoftim.

“Duke thënë gënjeshtra për sjelljet e supozuara të paligjshme të anëtarëve të BIA-s, Sanduloviqit dhe promotorëve të tjerë të të ashtuquajturës pavarësi të Kosovës, duan të dezinformojnë dhe shqetësojnë opinionin vendor dhe të huaj, të dëmtojnë reputacionin e Agjencisë për Siguri dhe Informacion dhe të destabilizojnë situatën e sigurisë në Republikën e Serbisë”, thekson agjencia.

Anëtarët e BIA-s do të vazhdojnë të veprojnë profesionalisht dhe me përgjegjësi në përputhje me Kushtetutën dhe ligjet e Republikës së Serbisë për të mbrojtur rendin dhe sigurinë e Republikës së Serbisë dhe qytetarëve të saj, thuhet më tutje në njoftimin e tyre. /Telegrafi/