Bebe Rexha duket thuajse e panjohur pa makijazh rrugëve të Beverly Hills, pak kohë pasi prishi kontratën e saj me shtëpinë diskografike Warner Records

Këngëtarja e njohur, e cila ka kryesuar top-listat, dukej pothuajse e panjohshme teksa u pa në lagjen Beverly Hills të martën.

Ylli i lindur në Brooklyn, 35 vjeçe, familja e së cilës vjen nga Maqedonia e Veriut, ishte larg shkëlqimit të tapetit të kuq teksa ecte rrugës pa grim gjatë një daljeje të lirshme, shkruan DailyMail.

Kjo ishte shfaqja e saj e parë publike pasi raportohet se është larguar nga shtëpia diskografike Warner Records, pas më shumë se një dekade bashkëpunimi.

Bukuroshja bionde kishte zgjedhur një stil casual, e veshur me një kostum të zi sportiv, ndërsa flokët i kishte të lëshuara në kaçurrela të çrregullta natyrale, teksa shkonte në një takim.

Lexo po ashtu Bebe Rexha i jep fund lidhjes me arkitektin grek Simos Liakos?

Artistja e nominuar për çmimet “Grammy” e kompletoi pamjen me shapka të zeza dhe shoqërohej nga një shoqe.

A mund ta gjesh se kush është?

Po, është Bebe Rexha!

Muajin e kaluar u raportua se Bebe Rexha është larguar nga shtëpia diskografike Warner Records me të cilën po punonte prej vitesh.

Këngëtarja shqiptaro-amerikane është ndarë nga kjo kompani pas një sërë mosmarrëveshjesh mes tyre.

Bebe Rexha pati një hit botëror në vitin 2022 kur bashkëpunoi me David Guetta-n për këngën “I’m Good (Blue)” dhe ka publikuar tri albume me Warner që nga nënshkrimi i kontratës në vitin 2013.

Megjithatë, burime për tabloidin britanike The Sun kanë thënë se marrëdhëniet mes tyre u tensionuan gjithnjë e më shumë, me Bebe-n që ndihej e zhgënjyer për drejtimin e karrierës së saj.

Një burim tha: “Bebe ka qenë shumë e zhgënjyer për karrierën e saj, kështu që kur situata me Warner arriti në një pikë të pakapërcyeshme dhe ata thanë se ishte më mirë të ndalonin bashkëpunimin, ajo vendosi të mos e kundërshtonte këtë vendim”.

“Ajo u ka thënë miqve se dëshiron një fillim të ri dhe nuk ndjente se mund ta arrinte këtë aty”.

Një burim pranë Bebe-s i tha DailyMail: “Ajo nuk u largua nga Warner me përjashtim, por vendosën reciprokisht të ndahen sepse kishin vizione të ndryshme për momentin”.

DailyMail ka kontaktuar përfaqësuesit e Bebe Rexhës dhe Warner Records për komente, por nuk ka marrë përgjigje.

Largimi i Bebe-s nga Warner Records tashmë është bërë zyrtar, me emrin e saj të hequr nga faqja e internetit e kompanisë, ndërsa ajo i ka hequr ata nga lista e llogarive që ndjek në Instagram.

Ajo gjithashtu ka punësuar një ekip të ri menaxhimi për ta orientuar karrierën e saj në një drejtim të ri, pasi albumet e saj nuk kanë pasur sukses në renditjet në Mbretërinë e Bashkuar.

Albumi i saj debutues, “Expectations”, i publikuar në vitin 2018, është i vetmi që ka arritur të hyjë në top-lista, duke arritur vetëm në vendin e 33-të.

Bebe ka pasur më shumë sukses me bashkëpunimet e saj, përfshirë “Meant To Be” me Florida Georgia Line, i cili mban rekordin si kënga country më e dëgjuar në Spotify e të gjitha kohërave.

Por në vitin 2023, “One In A Million” me David Guetta-n arriti vetëm në vendin e 79-të, ndërsa kënga e saj me DJ-n britanik Nathan Dawe, “Heart Still Beating”, u rendit në vendin e 74-të.

Bebe më parë kishte shprehur frustrimin e saj për karrierën përmes një postimi në rrjetin X verën e kaluar, duke shkruar: “Kam qenë e NËNVLERËSUAR. Kam heshtur për një kohë shumë të gjatë. Nuk i kam parë shenjat edhe pse njerëzit mi kanë treguar vazhdimisht dhe kanë qenë SHUMË TË QARTA”.

Lexo po ashtu E diskriminuar nga industria e muzikës, Bebe Rexha reagon e frustruar në X: Kam shumë gjëra për të treguar

Ajo vazhdoi: “Dhe kur kam folur, më kanë heshtur dhe më kanë NDËSHKUAR nga kjo industri. Gjërat duhet të ndryshojnë ose do t’i tregoj të gjitha të vërtetat e mia. Të mirat, të këqijat dhe të shëmtuarat”.

Këngëtarja, e cila u bë e njohur pasi kompozoi dhe shkroi tekstin e hitit të Eminem dhe Rihanna, “The Monster” në vitin 2013, u rikthye në platformë për të sqaruar se postimi i saj nuk vinte vetëm nga një ndjenjë zemërimi.

“Është trishtuese. Jam ulur në dhomën e hotelit tim në Londër duke qarë me dënesë”, shkroi ajo. “Kam ndier një dëshpërim të madh për një kohë të gjatë. Kam ecur shumë nëpër këtë qytet dhe duke takuar fansat e mi, ata më kanë ngjallur diçka brenda meje”.

Në përgjigje të një fansi që e pyeti “Çfarë ka ndodhur përsëri?” nën postim, Rexha u përgjigj: “Përsëri? Nuk keni dëgjuar as 5 për qind. Nuk keni ASNJË IDE”.

Kur u pyet se kush po e pengonte të fliste, ajo shkroi: “ATA TË NDËSHKOJNË”.

Pasi një përdorues i X insinuoi se ajo po bënte këtë për të tërhequr vëmendje për këngën e saj të re, “I’m the Drama”, ajo iu përgjigj: “JAM E NGOPUR.”

Gjatë karrierës së saj, Rexha ka shkruar këngë për: Selena Gomez, Nick Jonas, Iggy Azalea, Florida Georgia Line, Tate McRae, Mickey Guyton dhe shumë të tjerë.

Në gusht, ylli gjithashtu pretendoi me zemërim se ishte “kërcënuar” nga një agjent sigurie për faktin që fliste shqip dhe u ndalua nga hipja në një fluturim të ‘Lufthansa’-s nga Aeroporti i Mynihut. /Telegrafi/