Juventusi është shumë afër që t'i sigurojë shërbimet e sulmuesit të Nice, Mario Balotelli, si lojtar të lirë - bën të ditur një njoftim në The Sun.
Sipas gazetës britanike, që e konsideron lajmin si ekskluziv, raporti i mirë i Bianconerëve me agjentin e italianit, Mino Raiola, është vendimtar, kur kihet parasysh se ai përfaqëson edhe Blaise Matuidin dhe Moise Keanin.
(Foto: Getty Images)
Madje flitet për një kontratë pesëvjeçare për sulmuesin 27-vjeçar, i cili thuhet se do të mirëpritet te Zonja e Vjetër, sidomos nga kapiteni Gianluigi Buffon që dëshiron t'i ndihmojë SuperMarios që të kthehet në majat e futbollit.
The Sun raporton se te Juve, Balotelli nuk do të ishte vetëm një rezervist i zakonshëm i Gonzalo Higuainit, por do të luante rol të rëndësishëm në sukseset e skuadrës .
Mario ka shkëlqyer këtë edicion me Nice duke shënuar 18 gola në 23 paraqitje me klubin francez.
(Foto: Getty Images)
Në të kaluarën, 27-vjeçari ka luajtur për rivalët e bardhezinjve, Inter dhe Milan, ndërsa karriera e tij është zhvilluar edhe në Angli, te Manchester City dhe Liverpooli.
(Foto: Getty Images)
Ai ka qenë ndër lojtarët kryesore të Italisë në 'Euro 2012', mirëpo problemet me disiplinën kanë bërë që trajnerët të mos e angazhojnë te klubet e mëdha. /Telegrafi/
