Autostrada Biennale në 10-vjetorin e themelimit zgjeron hapësirat krijuese dhe bashkëpunimin me partnerët

Autostrada Biennale në Prizren ka finalizuar përgatitjet për shënimin e 10 vjetorit të themelimit, në kuadër të të cilit program do të inaugurohen edhe Hangar II, Rezidenca për Artistët dhe Teatri i Hapur, brenda kompleksit të Parkut të Inovacionit dhe Trajnimeve. Në të njëjtën kohë do të mbahet edhe Programi i Samitit në bashkëpunim me partnerët e Rrjetit të Qendrave të Fondacionit Allianz.

Ngjarja e kremtimit të 10-vjetorit të Autostrada Biennale me programet përcjellëse do të realizohet me 14, 15 dhe 16 shtator, raporton Telegrafi.

Drejtorët themelues të Autostrada Biennale, Leutrim Fishekqiu, Vatra Abrashi dhe Barış Karamuço në ftesën për kremtimin e dekadës së parë të këtij institucioni të artit bashkëkohor në Prizren kanë vënë në pah të arriturat e deritanishme.

“Gjatë dekadës së shkuar, Autostrada Biennale është rritur në një platformë të gjallë për kreativitet dhe shkëmbim kulturor, duke u fokusuar në rritjen e komunitetit, pasurimin e skenës sociale dhe kulturore të Kosovës dhe fitimin e njohjes ndërkombëtare”.

Sipas tyre zgjerimi i hapësirave paraqet edhe rritje të mundësive.

“Sot, derisa zbulojmë Autostrada Hangar II së bashku me Autostrada Hangar I ekzistues, ne festojmë jo vetëm një zgjerim të hapësirës, ​​por edhe një zgjerim të mundësisë. Falë këtij Hangari të ri, ne do të kemi një hapësirë ​​më të madhe krijuese fizike dhe mendore për vizionin tonë të ardhshëm dhe programet gjithëpërfshirëse, duke e bërë Autostrada Biennalen një qendër që vazhdon të frymëzojë, krijojë dhe promovojë artin dhe kulturën me një qasje inovative”.

Një ftesë të ngjashme ka bërë edhe Fondacioni Allianz, duke sqaruar se në Prizren do të festohet rritja dhe qëndrueshmëria kulturore më partnerët e rrjetit të sipërpërmendur.

Aty sqarohet se si ky organizim ka të bëjë me tre momente të rëndësishme që tregojnë se sa e përkushtuar ka qenë Autostrada Biennale për të bërë ndryshimin, raporton Telegrafi.

“10-vjetori i Autostrada Biennale: Një dekadë e transformimit të skenës kulturore të Kosovës dhe lidhjes së saj me botën.

Hapja e Hangarit të Dytë të Autostradës: Një hapësirë e re e krijuar me 50% materiale të ricikluara nga Biennalet e kaluara, duke vazhduar angazhimin tonë për qëndrueshmëri.

Mini Samiti i Dytë i Rrjetit të Qendrave të Fondacionit Allianz: Një takim i qendrave kryesore kulturore të Evropës për të ndezur bashkëpunimin dhe idetë e reja”.

Sipas Fondacionit Allianz këto arritje pasqyrojnë se si Autostrada Biennale po i jep formë të ardhmes kulturore të Kosovës dhe si po e lidh atë me komunitetin botëror të artit.

Në samit, sipas njoftimit, do të ketë diskutime mbi restaurimin, bashkëpunimin dhe qëndrueshmërinë kulturore, pastaj punëtori kreative që përziejnë artin e kuzhinës me shprehjen artistike, po ashtu sesione mbi riciklimin e artit dhe përqafimin e praktikave të qëndrueshme, si dhe muzikë.  /Telegrafi/