U takua me djemtë e Armstrongut, flet astronomja Hyseni

Astronomja kosovare Pranvera Hyseni, gjatë një interviste për Telegrafin ka treguar momentin e parë kur i ka takuar dy djemtë e astronautit Neil Armstrong, njeriut të parë që shkeli në Hënë në vitin 1969.

Hyseni tregoi se gjatë një konference në Shtetet e Bashkuara të Amerikës (ShBA), e ftuar si folëse për të ndarë përvojat e saj në promovimin e astronomisë në Kosovë takoi djemtë e Armstrong.

“Ka qenë para 7 vitesh, ku unë kam qenë e ftuar në një konferencë në SHBA, e aty mblidhen astronautë, shkencëtarë, e unë aty isha e ftuar si folëse për të treguar veprimtarinë në Kosovë në atë kohë se si një organizatë dhe se si një grup të rinjsh po mundohemi me përhap shkencën e astronomisë dhe në atë konferencë ishin dhe dy djemtë e astronautit, Neil Armstrong, i cili është njeriu i parë që ka shkel në hënë”, tha ajo.

Hyseni tha se djemtë e Armstrong nuk janë astronautë, por ndajnë histori të babait të tyre në konferenca të tilla duke treguar historinë e jetës së tyre me një figurë kaq ikonike të hapësirës.

Lexo po ashtu Kosova pritet të bëhet me teleskopin më të madh diellor, flet astronomia kosovare Pranvera Hyseni

“Ata kanë hobe apo profesione tjera. Arsyeja se pse ata shkojnë në këto konferenca është se Neil Armstrong ka bërë histori. Meqë ai më nuk është në mesin tonë, pasi ka ndërruar jetë para disa vitesh, atëherë fëmijët e tij e bartin trashëgiminë e tij, duke treguar historinë se si është të jetosh me një astronautë…”.

Astronomja kosovare tha se ende e ruan shoqërinë me djemtë e tij.

“Për mu, me u taku me fëmijët e Neil Armstrong dhe me bë pyetje ka qenë interesant. Kam ende shoqëri me ta, i kam të dy në rrjete sociale dhe më ndjekin vazhdimisht me aktivitetet që i kam dhe shpesh na bjen me u taku”, tha Hyseni. /Telegrafi/