Arrestohet gruaja që dyshohet se ‘ia bëri dhuratë’ blogerit të famshëm rus një bust që shpërtheu

Zyrtarët rusë thonë se kanë arrestuar një të dyshuar për vdekjen e një blogeri ushtarak pro luftës, i vrarë në një shpërthim në një kafene në Shën Petersburg.

Sipas mediave të huaja, përcjell Telegrafi, Daria Trepova, 26 vjeçe, është arrestuar pas vdekjes së Vladlen Tatarsky, në shpërthimin i cili ndodhi në një kafene teksa ai po zhvillonte një takim të dielën, tha Komiteti Hetues i Rusisë.

Rreth 30 persona u plagosën gjithashtu nga shpërthimi, ku 10 prej tyre thuhet se janë në gjendje kritike, sipas autoriteteve.

Tatarsky, 40 vjeç, emri i vërtetë i të cilit ishte Maxim Fomin, kishte më shumë se 560,000 ndjekës në Telegram.

Ai ishte një nga blogerët më të shquar ushtarakë me ndikim, të cilët kanë dhënë një koment të vazhdueshëm mbi pushtimin rus të Ukrainës.

Raportet ruse të lajmeve thanë se bomba ishte fshehur në një bust të blogerit që i dyshuari ia kishte dhënë atij si dhuratë pak para shpërthimit.

Zyrtarët e kundër-terrorit në Rusi e kanë deklaruar incidentin si një sulm terrorist, për të cilin ata pretendojnë se ishte planifikuar nga shërbimet speciale ukrainase dhe përfshinte “bashkëpunëtorë” nga Fondacioni Anti-Korrupsion Navalny.

Grupi jofitimprurës, i cili ka hetuar korrupsionin mes zyrtarëve të lartë rusë, u themelua nga lideri i opozitës Alexei Navalny, i cili aktualisht po vuan një dënim me burg në Rusi për mashtrim të dyshuar dhe shpërfillje të gjykatës. /Telegrafi/