Ancelotti nuk dorëzohet për titullin: Do të luftojmë deri në fund

Real Madridi nuk ka arritur më shumë se një barazim pa gola 0-0 në udhëtim te Real Betis.

Me këtë barazim Los Blancos kanë mbetur nëntë pikë mbrapa liderit Barcelonës në tabelë dhe mbrojtja e titullit bëhet edhe më e vështirë.

Por përkundër diferencës së madhe në tabelë me Barcelonën, trajneri i Real Madridit, Carlo Ancelotti ka thënë se nuk dorëzohen për titullin dhe se do të luftojnë deri në fund për ta mbrojtur atë.

“Mendoj se kjo ndaj Betis ishte një ndeshje e hapur deri në fund, por në disa momente na mungoi efikasiteti. Kishim disa raste që mund të kishim shënuar”.

“Për fat të mirë, u treguam të zotë sa i takon aspektit defensivë dhe për mendimin tim kampionati ende nuk mund të konsiderohet i mbyllur”, tha Carlo Ancelotti.

Trajneri italian thotë se duhet të bëjnë më mirë në sfidat në vazhdim për t’iu afruar në pikë katalunasve.

Lexo po ashtu Real Madridi vazhdon me barazime, ndalet edhe nga Betisi

“Sigurisht, avantazhi që ka Barcelona është shumë i vlefshëm për ata, por kemi detyrën që të luftojmë deri në fund. Ka edhe shumë ndeshje për t’u luajtur, por e kemi të qartë se duhet të bëjmë më mirë në sfidat e mbetura”, u shpreh Ancelotti.

Ndeshjen e ardhshme në kuadër të xhiros së 25 në La Liga, Real Madridi e zhvillon para adhuruesve të vet me Espanyolin. /Telegrafi/