Zbulohen mbetje mortore në afërsi të Gjakovës, dyshohet të jenë eshtrat e viktimave të luftës së fundit

Policia e Gjakovës ka rrethuar një zonë në rrugën që çon drejt Prizrenit, për shkak të dyshimeve se aty ka mbetje mortore.

Zëdhënësja e Policisë së Gjakovës, Lirije Podrimaj, tha për KALLXO.com se dyshohet se në këtë vend ka disa eshtra, porse ende nuk dihet saktë për çfarë është fjala.

“Kjo do të bëhet e ditur pasi të vijë ekipi përkatës nesër në vendin e ngjarjes”, tha Podrimaj.

KALLXO.com merr vesh se Policia është duke e ruajtur këtë vend qe së paku dy ditë. Po ashtu, burimet thonë se dyshohet që në atë vend të ketë eshtra të viktimave të luftës së fundit në Kosovë.