Ndeshja e të dielës ndërmjet Barcelonës dhe Real Madridit (2-2) u shoqërua me disa vendime nga gjyqtari që u konsideruan si kundërthënëse.
Trajneri i katalunasve, Ernesto Valverde, ka thënë se ishte habitur me ndërhyrjen e Sergi Robertos në fund të pjesës së parë.
Spanjolli u ndëshkua me karton të kuq për sjellje josportive kundrejt Marcelos, ashtu që Blaugranët e zhvilluan gjysmën e dytë me një lojtar më pak në fushë.
"Ishin disa momente kundërthënëse, do t'i shikoj xhirimet për t'i kuptuar më qartë. Ndërhyrja e Sergi Roberto ishte e çuditshme, jam i befasuar që e ka goditur në fytyrë. Do të më duhet ta rishikoj në televizion", ka deklaruar Valverde.
Edhe pse 'el Clasico' ishte vetëm një ndeshje prestigji, takimi rezultoi me një angazhim shumë të madh dhe me rivalitet ndërmjet dy gjigantëve spanjollë.
"Në një ndeshje si kjo, gjithmonë do të ketë tension. Ishte intensive që nga minuta e parë. Të gjithë duam t'i mposhtim rivalët tanë. Golat u shënuan shpejt dhe pastaj u bë vështirë".
"Në gjysmën e dytë luftuam shumë, në mënyrë që inferioriteti numerik nuk u vërejt. Nuk u ndalëm së sulmuari. U desh të angazhoheshim bashkë dhe të mos dorëzoheshim në sulm", ka deklaruar trajneri i Barcelonës. /Telegrafi/