Radja Nainggolan po kalon një formë të shkëlqyer te Cagliari, aty ku kaloi në huazim nga Interi.
Cagliari së bashku me mesfushorin belg në ekip, janë një nga befasitë më të mëdha në Serie A, teksa pas 13 ndeshjeve të zhvilluara kanë grumbulluar 25 pikë dhe renditen në vendin e katërt.
Belgu ka dhënë një intervistë ku tha se dëshiron t’i tregojë Interit se gabuan që e larguan dhe tregon arsyen pse zgjodhi Cagliarin.
“Unë dua t’i tregoj Interit se ata gabuan. Jam duke luajtur shumë mirë dhe rezultatet e Cagliarit janë gjithashtu të mira. Është diçka shumë e mirë për mua, edhe pse nuk dua të gëzohem para kohe”.
“Mund të kisha shkuar te Fiorentina ose tek disa ekipe të tjera, por problemi që kishte gruaja ime më bëri që zgjedhja ime të ishte Cagliari. Preferova të zgjedh qytetin ku ajo jeton”.
“Ajo po lufton me sëmundjen e saj dhe për fat të mirë gjithçka po shkon shumë mirë”, ka thënë Nainggolan. /Telegrafi/