Juventusi ka rikthyer interesimin për mesfushorin e Paris Saint Germainit, Marco Verratti.
Zonja e Vjetër ishte shumë afër të nënshkruante me italianin sa ishte në Pescara, por ai në fund vendosi t'i bashkohet klubit nga Ligue 1 në verën e 2012.
Por, raportimet në media për interesimin e Juves për mesfushorin nuk janë ndalur asnjëherë dhe ato kanë rifilluar prapë sot (e martë) nga Corriere dello Sport.
Qëllimi i kampionëve të Serie A është të nënshkruajnë gjatë verës me një mesfushor cilësor dhe 25-vjeçari së bashku me Sergej Milinkovic-Savic e Lazios, janë objektivat kryesor.
Verratti është një nga më të mirët në botë në rolin e tij, por ka pasur disa probleme me lëndime në sezonet e fundit.
Për shkak të lëndimit, lojtari është paraqitur vetëm në 20 ndeshje në Ligue 1 këtë sezon.
Çmimi i lojtarit është rreth 70 milionë euro. /Telegrafi/