Trajneri i Nantes, Claudio Ranieri, thuhet se është kontaktuar për punën e stolit të Italisë pasi Carlo Ancelotti, Roberto Mancini dhe Max Allegri vendosën ta refuzojnë atë.
Kombëtares së Italisë i nevojitet një taktikant i ri, pasi Giampiero Ventura u shkarkua pasi humbi ndeshjen kualifikues për Kupës së Botës 2018 ndaj Suedisë me rezultat përfundimtar 1-0.
Ancelotti ishte zgjedhja e parë, por sot agjenti dhe ndërmjetësi i tij, Giovanni Branchini deklaroi për Radio Deejay se ish-trajneri i Bayern Munichut do ta refuzojë atë.
Ai nuk është i bindur nga projekti dhe mungesa e reformave në FIGC, së bashku me konfuzionin mbi statusin e Presidentit të Federatës, Carlo Tavecchio.
Sipas mediumit italian Calcionews24.com, emri i fundit i kontaktuar nga FIGC është Ranieri, i cili aktualisht po bën shumë mirë në Ligue 1 me Nantes.
Ranieri është më i famshëm për fitimin e titullit me Leicester Cityn në Ligën Premier duke befasuar të gjithë, por ai ka disa përvoja të këqija me futbollin ndërkombëtar.
Atij i zgjati vetëm disa muaj puna në stolin e Greqisë në vitin 2014, duke u provuar të ishte një dështim i madh me një pikë nga katër ndeshje.
Ky dështim i tij përfshinte një humbje 1-0 në shtëpi nga kombëtarja inferiore e Ishujve Faroe. /Telegrafi/
