Boksieri nga Kosova, Senad Gashi, i ka bërë ballë Dereck Chisoras deri në fund të duelit prej 10 raundesh në kategorinë e peshave të rënda që u zhvillua në O2 Arena të Londrës, për të humbur me vendim të gjyqtarëve.
Në fund të meçit, të tre gjyqtarët vendosën në favor të boksierit britanik (100-90, 100-91, 99-91).
Raundi 1 Nuk pati shumë aksion dhe dy boksierët ishin më të kujdesshëm duke mos ndërmarrë tentativa.
Raundi 2 Boksieri shqiptar, i cili në peshime ishte më i lehtë se kundërshtari i tij, nuk është u angazhua shumë dhe priste reagimin e Chisoras.
Raundi 3 Gashit, i cili në këtë arenë kishte pësuar nga Carlos Takam në dhjetorin e kaluar, iu dha paralajmërim për shfrytëzimin e kokës. Ndërkohë që Chisora filloi ta ngushtonte hapësirën ndërmjet tyre duke e goditur në trup boksierin nga Kosova.
Raundi 4 Shqiptari që bën karrierë në Gjermani arriti të mbahej mirë pas një goditjeje të kundërshtarit me të djathtën.
Raundi 5 Chisora vazhdoi të ishte i përmbajtur, ndërkohë që Gashi dukej i lënduar, megjithatë vazhdoi t'i rezistonte kundërshtarit të tij.
Raundi 6 Plani i Senadit filloi të dështonte, pasi e kishte të vështirë përballjen ndaj Dereck. Mirëpo, ai u tregua i qëndrueshëm në goditjet e rivalit. Ndërkohë që as Chisora nuk ofronte diçka spektakolare.
Raundi 7 Gashi tentoi ta vinte në vështirësi Chisoran, mirëpo ky i fundit vazhdonte ta ruajë përqendrimin. Boksieri nga Peja vazhdonte të ishte i disponuar.
Raundi 8 Tifozët nuk ishin të kënaqur me meçin filluan ta quanin 'të mërzitshëm'. Ishte pritur shumë nga Chisora, por ai nuk tregohej i rrezikshëm për Gashin.
Raundi 9 Përpjekjet e Chisoras u neutralizuan nga Gashi, i cili arriti t'i shkonte duelit deri në raundin e dhjetë dhe të fundit.
Raundi 10 Chisora u përpoq ta mbyllte në mënyrë spektakolare, por ashtu nuk mendoi Gashi, i cili e mbylli sfidën në këmbë dhe u mbeti gjyqtarëve ta vendosnin fituesin.
/Telegrafi/