Dron i dyshuar bjellorus në Lituani, vendi në gatishmëri
Ushtria lituaneze ka gjetur një dron që beson se ka hyrë në hapësirën e saj ajrore nga Bjellorusia pas disa ditësh kërkimesh, njoftoi sot ushtria.
Droni u gjet në poligonin e stërvitjes ushtarake Gaiziunai pranë qytetit të Jonavës.
Sipas raporteve fillestare, është një dron i ashtuquajtur Geran, i cili nga jashtë i ngjan dronëve luftarakë Shahed të përdorur nga Rusia në luftën e saj kundër Ukrainës.
Ende nuk dihet nëse droni është i pajisur me eksplozivë apo nëse përmban karburant.
Ushtria lituaneze dhe autoritete të tjera kanë hetuar për pesë ditë një incident që përfshin një objekt fluturues të vërejtur nga qytetarët.
Objekti është parë për herë të fundit pranë kryeqytetit Vilnius.
Sipas ushtrisë, droni ka shumë të ngjarë të jetë devijuar nga mbrojtja ajrore ukrainase.
Por, ky nuk është rasti i parë i tillë.
Kur u pyetën se si objekti fluturues u rrëzua pa u vënë re në terrenin e stërvitjes ushtarake lituaneze, përfaqësuesit e ushtrisë shpjeguan se nuk ka pajisje radari në atë zonë.
Tani Lituania, një anëtare e NATO-s dhe Bashkimit Evropian, po kërkon një deklaratë nga qeveria bjelloruse.
Pas zbulimit të mjetit, qeveria në Vilnius i dërgoi një notë proteste udhëheqjes autoritare në Minsk duke kërkuar një shpjegim.
Përveç kësaj, vendi baltik ka vendosur trupa shtesë dhe sisteme të mbrojtjes ajrore në kufirin e saj me Bjellorusinë. /Telegrafi/