Barcelona raportohet se i ka bërë të qartë trajnerit Hansi Flick që të qëndrojë larg çdo diskutimi rreth Jose Mourinhos, pas rikthimit të trajnerit portugez në stolin e Real Madridit.
Sipas Diario SPORT, drejtuesit e klubit katalanas ia kanë kujtuar Flickut polemikat e shumta të periudhës së parë të Mourinhos në Madrid, përfshirë përplasjet e tij me Pep Guardiolën dhe incidentin e famshëm me ish-ndihmësin e Barcelonës, Tito Vilanovën.
Mesazhi i klubit për Flickun ka qenë i qartë: “Asnjë fjalë për Mourinhon apo Real Madridin”.
Dhe trajneri gjerman duket se ka vendosur t’i përmbahet këtij udhëzimi.
I pyetur për Mourinhon përpara ndeshjes së parë të Barcelonës në kampionat ndaj Elches, Flick e shmangu menjëherë temën.
“A luajmë nesër kundër Real Madridit? Atëherë më pyesni për Elchen”, deklaroi ai.
Mourinho, ndërkohë, ka folur tashmë për Barcelonën pas rikthimit të tij në stolin madrilen, por Flick ka refuzuar të përfshihet në rivalitetin verbal mes dy klubeve.
Kjo qasje pritet të vazhdojë edhe në të ardhmen, me trajnerin e Barcelonës që do të tregohet i kujdesshëm sa herë që tema e Mourinhos apo Real Madridit të jetë pjesë e konferencave për shtyp.
Megjithatë, me afrimin e El Clasicos, pyetjet rreth Mourinhos do të jenë të pashmangshme.
Barcelona, në këtë situatë, duket se ka vetëm një objektiv: të mos i japë Mourinhos asnjë mundësi për të ndezur një tjetër polemikë. /Telegrafi/