Në “Debat Plus” me Ermal Pandurin në RTV Dukagjini po debatohet me përfaqësuesit e Lidhjes Demokratike të Kosovës.
Në këtë debat ka pasur përplasje mes përfaqësuesit të LDK-së, Arben Gashi dhe drejtorit të “Çohu”, Arton Demhasaj.
Në bazë të hulumtimeve të Organizatës Çohu, LDK-në vetëm PDK-ja e kalon sa i përket punësimeve të zyrtarëve të lartë publikë.
Kjo statistikë e prezantuar nga moderatori Ermal Panduri ka përplasur Gashin dhe Demhasajn, përcjell Telegrafi.
Ish-deputeti i LDK-së thotë se kjo statistikë është një gjeneralizim pasi sipas tij ligji e parasheh që 50% e ambasadorëve të jenë politikë.
“Është normale që të ketë ambasadorë politikë pasi ata e përçojnë politikën e qeverisë. Është normale që presidenti apo kryeministri të ketë ambasadorin e vet në Bruksel apo Uashington pasi ata njerëzit kryesorë që përçojnë politikën e tij, por duhet të ketë edhe ambasadorë të karrierës”.
Demhasaj ka reaguar duke thënë se pikërisht ambasadorë të karrierës nuk ka pasur.
Drejtori i Çohu ka replikuar më tej duke thënë se nuk nënkupton që agjencionet e themeluara nga Kuvendi e Qeveria të mbushen me përfaqësues politikë.
Gashi ka thënë me tej se mund të ketë pasur punësime të tilla jo korrekte por sipas tij “ky nuk ka qenë koncept i LDK-së”.
Edhe Fidan Rama ka reaguar duke thënë se Gashi po mundohet të legjitimojë disa punësime që nuk kanë qenë të drejta./Telegrafi/