“Aleanca për Shqiptarët nuk largohet nga qeveria”

Treshja e koalicionit qeveritar, LSDM, BDI dhe Aleanca për Shqiptarët, do të vazhdojë të mbetet e njëjtë. Zyrtarisht nga Qeveria deklaruan se në këtë institucion nuk ka pasur dhe nuk do të ketë një debat të tillë, duke na adresuar për përgjigje te partitë. Nga partia e Ziadin Selës përsërisin qëndrimin e tyre se janë të përcaktuar për reforma dhe për bashkëpunim në zbatimin e programit qeveritar me të cilin parashikohen këto reforma.

“Qeveria është një sistem, një tërësi e cila duhet të përbëhet prej njësive që kanë veçori të përbashkëta. Në rastin konkret, ne e llogarisim veten si qeveri reformatore dhe unë nuk shoh asnjë arsye që Aleanca për Shqiptarët të mos jetë pjesë e kësaj qeverie sepse ne jemi të përcaktuar për të bërë reforma”, deklaroi për Alsat-M, Elmi Aziri, shef i shtabit zgjedhor të Aleancës për Shqiptarët.

Që largimi i Aleancës për Shqiptarët nuk është diskutuar mes partnerëve të koalicionit, pohon edhe LSDM-ja.

“Nuk ka një gjë të tillë. Koalicioni është në bazë të principeve dhe presim të vazhdojë bashkëpunimi në drejtim të zbatimit të reformave në interes të të gjithë qytetarëve”, njoftojnë nga LSDM-ja.

Nga BDI-ja thonë se presin vazhdimin e bashkëpunimit mes tre partive, në qeverisjen qendrore dhe në atë lokale.

“Ne jemi të bindur se reformat janë ata të cilat qytetarët presin. Një bashkëpunim i mirë me komunat, rrumbullakimi i Marrëveshjes së Ohrit në aspektin e barazisë etnike dhe anëtarësimi në NATO dhe BE… Kjo është ajo që pritet nga ne kurse sa i takon qëndrimeve të Aleancës ata vetë do ta sqarojnë pozicionin e tyre”, deklaroi në emisionin “200” në Alsat-M, Fatmir Besimi, shef i shtabit zgjedhor të BDI-së.

Zërat për largimin e mundshëm të Aleancës për Shqiptarët nga Qeveria u shtuan pas koalicionit të kësaj partie me Lëvizjen Besa, para rrethit të dytë të zgjedhjeve lokale.