Adrian Devolli për GKA-në: Mediokrët po glorifikohen, gjigantët po shuhen në mizerje

Ish-Galeria Kombëtare e Arteve (GKA) në hyrje të muajit të tretë të 2019-ës, ende pa asnjë aktivitet ekspozues. Ndërkohë që pritet të publikohet Kalendari i Sezonit, piktori Adrian Devolli rrëfen “ngërçet” e institucionit

Java e fundit e shkurtit e gjen Muzeun e Arteve të Bukura, të mbyllur për publikun. Punimet e brendshme që po kryhen prej dy ditësh në ambientet e saj (zgjasin deri në 24 shkurt) përbëjnë të vetmen veprimtari të re për 2019-ën, ose më së paku për optimistët paralajmërojnë një ekspozitë të re…

Ekspozita e fundit, “Kolazhe dhe edicione”, nga artisja gjermane Ruth Wolf-Rehfeldt) u çel rreth pesë muaj më parë dhe është një nga tre ekspozitat e vetme për vitin që lamë pas. Më pak se një gjysmë viti, qëndroi e hapur në MBA edhe ekspozita e artistes Flaka Haliti nga Kosova, “Këtu, apo atje është më atje”, një veprimtari që erdhi falë një marrëveshje mes dy vendeve, ku edhe një artist shqiptar do të duhej të ekspozonte në Kosovë. Artistët janë shprehur skeptikë për kohëzgjatjen e ekspozitave në fjalë, ndërsa vlerësojnë pjesëmarrjen e Edi Hilës gjatë 2018-ës, si “Piktori i transformimit”.

Ende në pritje për t’u njohur me kalendarin artistik për këtë vit, Muzeu i Arteve të Bukura, si dhe Ministria e Kulturës bëjnë me dije se Bordi Artistik në fillim të vitit ka miratuar Programin Artistik, që do të publikohet brenda kësaj jave, duke përfshirë dhe emrat e artistëve që do të prezantohen në ish-GKA.

Për piktorin Ardian Devolli, ambienti i Muzeut i Arteve të Bukura është mjaft familjar, jo vetëm si vizitor e artist, por edhe për shkak të punës si restaurator që ka kryer gjatë viteve 1987-1991. Më të ndjeshëm ndaj situatës së krijuar e bën edhe kontributi që i ati, “Piktori i merituar” Hysen Devolli (themeluesi i skenografisë shqiptare), ka dhënë për këtë institucion, si ish-drejtues i saj dhe artist. Shumë nga veprat e tij janë pjesë e Fondit të MAB-së.

“Pavarësisht vendimeve të bordit, mendoj se është e domosdoshme një mbledhje me dyer të hapura mes artistëve dhe Ministrinë e Kulturës, pasi në këtë pikë çështja i takon këtij institucioni. I ftoj përgjegjësit të mos mbyllen zyrave, por t’u ofrojnë artistëve mundësinë e një debati të hapur, ku mendimet do të rrihen. Jemi në një situatë ku artistë mediokër në të gjitha fushat e artit glorifikohen, dhe ‘gjigantët’ si Kujtim Laro e të tjerë shuhen në mizerje”, thotë ai. /Anila Dedaj/Shekulli/