Ademi ia dhuron fanellën e Kosovës ambasadorit amerikan Jeffrey Hovenier

Kosova ka humbur me rezultat minimal 0-1 në stadiumin Fadil Vokrri nga Greqia.

Ishte një atmosferë fantastike në kryeqytetin kosovar ku të pranishëm në tribuna ishin shumë personalitete.

Njëri nga ta ishte edhe Ambasadori amerikan në Kosovë, Jeffrey Hovenier i cili është edhe një adhurues i madh i futbollit.

Hovenier ka marrë dhuratë një fanellë të Kosovës nga presidenti i Federatës së Futbollit të Kosovës, Agim Ademi.

Njoftimi i plotë nga Agim Ademi:

Është nder ta kesh mbështetjen e ambasadorit amerikan Jeffrey Hovenier.

Ai është një fans i madh i Kombëtares së Kosovës, prandaj në ndeshjen kundër Greqisë e kisha kënaqësinë që t’ia dhuroja fanellën dardane.

E mbrëmë fati nuk ishte me ne dhe nuk e morëm rezultatin që e dëshiruam, por futbolli është i tillë dhe jo rrallë nuk fiton ai që e kërkon atë me ngulm.

Sidoqoftë, djemtë tanë kanë nevojë për t’i qëndruar afër dhe për t’i përkrahur maksimalisht. Ata po mundohen ta japin më të mirën e tyre dhe besojmë se në ndeshjet e ardhshme do të marrin rezultatet që i presim të gjithë.

Falënderoj edhe ambasadorët e tjerë të Britanisë së Madhe, të Zvicrës, të BE-së dhe të Greqisë që krahas institucioneve tona ishin në ndeshje dhe janë përkrahës të Dardanëve.

E një falënderim edhe për të gjithë tifozët, të cilët krijuan atmosferë madhështore në ndeshjen e mbrëmshme, e të cilët në fund përkundër rezultatit zhgënjyes i duartrokitën Dardanët tanë.

FORCA KOSOVË! /Telegrafi/