7 Marsi – Dita e Mësuesit, shkolla e parë shqipe në Pejë një trashëgimi kombëtare

Shkolla e parë shqipe në Pejë u hap në vitin 1915 dhe mori emrin “Haxhi Zeka”, në nder të njërit prej themeluesve të saj, Haxhi Zeka.

Kjo ndodhi 28 vite pas hapjes së Mësonjëtores së Parë Shqipe në Korçë.

Sot, kjo shkollë e njohur historikisht është kthyer në muze, ku vizitorët mund të nderojnë dhe eksplorojnë trashëgiminë e saj arsimore dhe kulturore. Muzeu i Shkollës “Haxhi Zeka” mbledh dëshmi dhe artefakte që ndihmojnë në ruajtjen e kujtesës kolektive për sakrificat dhe përkushtimin e mësuesve dhe aktivistëve shqiptarë të periudhës, raporton Telegrafi.

Shkolla “Haxhi Zeka”, që ishte dhe paralelja e ndarë e Shkollës Fillore të Mesme të Ulët “Tetë Marsi”, u themelua nga veprimtari dhe patrioti i shquar Haxhi Zeka, njëri nga themeluesit e Lidhjes “Besa-Besë” në Pejë. Ky institucion ka luajtur një rol të madh për edukimin e fëmijëve shqiptarë dhe zhvillimin e arsimit kombëtar në një kohë kur arsimi shqip ishte i ndaluar dhe arsimi në gjuhën serbe ishte imponuar nga autoritetet e pushtimit.

Në këtë shkollë mësoheshin lëndët e domosdoshme për formimin e një brezi të ri, si Gjuha Shqipe, Aritmetika, Gjeometria, Historia, Gjeografia, dhe disa lëndë praktike si bukurshkrimi, këndimi, dhe punët e dorës. Mësues të shquar si Halit Kastrati, Hamdi Tabaku, Xhevat Shkreli, Hajdar Berisha, dhe Zef Filip Krasniqi, ishin disa prej figurave që dhanë kontributin e tyre në formimin e brezave të rinj.

Në kujtim të sakrificës dhe përkushtimit të mësuesve të Shkollës “Haxhi Zeka” dhe të gjithë mësuesve që kanë kontribuar për arsimin shqiptar, Dita e Mësuesit është një moment për të nderuar të gjithë ata që kanë sakrifikuar për të dhënë dritë dhe dije./Telegrafi/