“16 banda duan të më zhdukin”, Durim Bami kundërshton ekstradimin në Shqipëri

Euronews Albania mëson se Durim Bami u është drejtuar me një kërkesë autoriteteve në Emiratet e Bashkuara Arabe, ku kërkon që të mos ekstradohet në Shqipëri.

Bami e ka argumentuar këtë kërkesë me shqetësimin se jeta e tij është në rrezik në Shqipëri. Ai pretendon se rrezikohet nga rreth 16 banda që synojnë eliminimin e tij fizik.

Ai thekson në kërkesën drejtuar autoriteteve në Emiratet e Bashkuara se një kthim në Shqipëri do të ishte fatal.

Arrestimi për herë të dytë i Bamit u konfirmua të hënën nga Interpol-i i Emirateve të Bashkuara Arabe në Abu Dhabi, pas arrestimit të mëparshëm në muajin qershor.

Durim Bami është një nga emrat më të përfolur të botës së krimit në Shqipëri. Ai rezulton i përfshirë në kultivimin e parcelave të drogës në zonën e Fushë-Krujës, po ashtu, mbi të rëndojnë akuzat për sigurimin e kushteve për të vrarë ish-deputetin e Partisë Socialiste në Lezhë, Arben Ndoka, si dhe për sigurimin e kushteve për të vrarë dy miqtë e Ervis Martinaj, Erigers Mihasin dhe Tori Xheçukën.

Autoritetet shqiptare tashmë po punojnë për të organizuar ekstradimin e tij, në mënyrë që të përballë akuzat që rëndojnë mbi të. Mund të ndiqet një mënyrë e ngjashme me Plaurent Dervishaj për ekstradimin e Bamit nga Dubai.