ZRRE: Gjykata Themelore nuk e anulon vendimin për rritjen e çmimit të energjisë

Zyra e Rregullatorit për Energji (ZRRE) ka thënë se Gjykata Themelore nuk e ka anuluar vendimin për zbatimin e tarifave të reja të rrymës.

Sipas ZRRE-së, palët e interesit duhet të përmbahen nga deklarimet, siç e kanë quajtur ata, të pamatura.

“ZRRE qartëson për publikun e gjerë dhe për konsumatorët se Gjykata ka marrë aktvendim për shtyrje të zbatimit të vendimit por jo anulim të vendimit. Për më tepër shqyrtimi meritor akoma nuk ka filluar nga Gjykata Themelore lidhur me vendimin për tarifat me pakicë. Prandaj, përderisa ende nuk ka ndonjë verdikt final të çështjes meritore nga gjykata, ZRRE fton të gjitha palët e interesit, që të përmbahen nga deklarimet e pamatura dhe të bëhen pjesë konstruktive e tejkalimit të krizës së energjisë”, thuhet në reagimin e ZRRE-së, përcjell Telegrafi.

Kjo zyre thekson se është duke zbatuar vendimet e gjykatave.

Lexo po ashtu Anulimi i vendimit të ZRRE-së për shtrenjtimin e rrymës – të gjitha reagimet rreth aktvendimit të Gjykatës së Apelit

“ZRRE informon publikun se është duke i respektuar aktvendimet e gjykatave të Republikës së Kosovës dhe bazuar në aktvendimin e gjykatës ka nxjerrë vendim për zbatim të këtij aktvendimi, e të cilin ia ka dërguar të licencuarit për zbatim”, thekson kjo zyre.

ZRRE-ja tregon se lidhur me këtë vendim i është drejtuar Gjykatës Supreme për mendimin juridik.

“Duke marrë parasysh paqartësitë rreth implementimit të vendimit të ngritura edhe nga Furnizuesi me Shërbim Universal lidhur me faturimin, ZRRE i është drejtuar Gjykatës Supreme për mendimin juridik, Gjykatës së Apelit, Gjykatës Themelore dhe Këshillit Gjyqësor duke kërkuar udhëzime lidhur me mënyrën e zbatimit të vendimit të Gjykatës”, tregon ZRRE.

Në fund, ZRRE thotë se “të gjithë konsumatorët e energjisë elektrike se nuk do të dëmtohen nga procesi i faturimit të energjisë elektrike”. /Telegrafi/